DILI, (TATOLI) – Ministru Komérsiu, Indústria no Ambiente, Constâncio Pinto hatete sei servisu hamutuk ho Minsitériu Turizmu, Arte no Kultura (MTAK) hodi kria diploma konjunta ou dekretu Governu ida hodi rekoñese tais Timor-Leste hanesan produtu ne’ebé mak úniku iha Nasaun antes lori ba Organizasaun Nasaun Unida ba Edukasaun, Siénsia no Kultura (UNESCO).
“Tanba ita lori ba UNESCO ne’e tais ida ne’ebé mak ita rekoñese hanesan patrimóniu Estadu, presiza iha tratamentu ne’ebé mak tenke úniku”, dehan Ministru foin lalais ne’e, iha otél Novo Turismo, Dili.
Costâncio hatutan Governu identifika ona tais ne’ebé mak úniku tanba iha tais barak maibé iha tais balun ne’ebé antigu liu ona.
Nune’e mos, Diretora Ezekutiva Timor Aid, Angelina Sarmento informa Sekretáriu Estadu Arte no Kultura halo ona levantamentu ba tais iha munisípiu lima ne’ebé organiza hamutuk ho komunidade atu identifika loloos motivu, dezeñu no prosesu tais husi munisípiu sira ne’e.
Rezolusaun Governu nian númeru 25/2011, 14 Setembru relativa ba protesaun patrimóniu kulturál, programa IV Governu Konstitusionál, iha pontu 3 relativu ba Arte no Kultura espresa determinasaun Governu iha koloka kultura ba servisu Nasaun no Estadu timorense. Dokumentu ne’e refere liuhusi kultura ne’ebé tenke pozisiona, prezerva, hariku no salva guarda identidade.
Relasiona ho patrimóniu kulturál, polítika nasionál kultura, aprova iha Konsellu Ministru loron 23 Setembru 2009, prevé kriasaun mekanizmu legál ne’ebé permite jestaun efikás no prezervasaun patrimóniu kulturál iha sentidu define direitu no devér sidadaun perante patrimóniu kulturál nasaun nian, kontribui ba nia salvaguarda no valorizasaun.
Estadu mak responsabilidade atu proteje no valoriza partimóniu kulturál hanesan instrumentu demokratizasaun asesu ba kultura no hanesan elementu fundamentál iha prosesu konsolidasaun ba identidade no soberania nasionál.
Jornalista: Maria Auxiliadora
Editora: Rita Almeida
