DILI (TATOLI) — Sekretáriu Estadu Juventude no Desportu, Leovigildo Hornai hateten, mehi hosi Liga Futeból Amadora (LFA) atu promove atleta nasionál sira bele tama iha klubu sira ne´ebé prestiju iha mundu, realiza duni.
“Ohin prova dala ida tan kona-ba ezisténsia Liga Futeból Amadora nian ho akordu ne´ebé maka ita halo ho Sporting Clube de Braga lori jogadór junior hosi AD SLB Laulara, João Pedro Freitas ba halo estájiu iha klubu refere,” Leovigildo dehan kestaun ne´e ba jornalista sira iha Hotel Timor, Dili, foin lalais ne´e.
Nia esplika katak fini hosi dezenvolvimentu futeból iha Timor-Leste ku´u dadauk ona maske nia rezultadu seidauk maka´as. Tanba ne´e, nia husu klubu no liga tenki hahú maka´as liu-tan dezenvolvimentu futeból iha Timor.
“Ita presiza hametin unidade no hametin espíritu interese nasionál para futeból ida ne´e bele sai identidade nasionál ida no bele promove liga amadora ne´e sai profisionál iha futuru,” governante ne´e sujere.
Jornalista: Xisto Freitas / Editor: Gantry Meilana
