DILI, (TATOLI) – Reprezentante Ministru Planeamentu Investimentu Estratéjiku (MPIE), Ministru Edukasaun, António da Conceição husu timoroan sira ne’ebé hetan oportunidade liuhusi bolsa estudu hodi estuda iha rai li’ur aproveita di’ak hodi reprezenta nasaun.
Perante família no bolseiru sira iha salaun Ministériu Defeza Fatuhada Dili, horseik reprezentante MPIE ne’e fó hanoin katak bainhira estudante timoroan ida estuda ona iha rai li’ur presiza fila ho kualifikasaun no obrigasaun tau aan hanesan estudante.
“Sai embaixadór Timor-Leste ninian atu reprezenta Nasaun, dignifika liuhusi imi nia aproveitamentu akadémiku iha universidade maibé mós iha imi-nia komportamentu iha sosiedade nia laran”, sujere.
Nune’e mós ministru edukasaun ne’e husu ba estudante timoroan sira atu labele hamihis kompromisu ne’ebé mak halo ba ukun rasik aan.
Inklui tenke manten nafatin identidade bainhira integra iha sosiedade ida. “Importante buka hakaas aan iha sosiedade ne’ebé integra ba, labele sai fali sosiedade ida ne’ebé eskluzivu. Continua ser timorense mas continua integrar-se dentro da sociedade”, haklaken.
Bainhira integra iha sosiedade ida buka halo konvivénsia labele izola aan. “Relasaun amizade ne’ebé luan liutan hodi aprende”, realsa.
Hatutan mós katak manten identidade nu’udar timoroan no hanoin nafatin espetativa inan-aman no nasaun ninian hodi banati kompromisu luta veteranu no kombatente sira hodi rejiste no afirma.
Jornalista: Rafy Belo
Editora: Rita Almeida
