DILI, (TATOLI) – Majór Jenerál FALINTIL-Forsa Defeza Timor-Leste (F-FDTL), Lere Anan Timur kontinua husu ba ema hotu atu kontribui ba estabilidade nasionál.
Relasiona ho mosaun rejeisaun, Lere Anan Timur akompaña hosi Komandante Jerál, Polísia Nasionál Timor-Leste (PNTL), Komisáriu Júlio da Costa Hornay, sesta, (20/10) loraik ne’e hasoru Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairo Pité.
“Hanoin katak mundu gaba ita, fó parabéns ba ita tanba ita nia maturidade no responsabilidade perante vida nasaun ninian”, ulun boot forsa defeza ne’e hatete ba jornalista sira hafoin hasoru malu.
Tuir Lere, demokrasia iha ninia limitasaun, la’ós halo arbiru tuir ema ida-idak nia hakarak. Tanba ne’e, nia afirma, sé de’it atu estraga situasaun iha rai laran, F-FDTL no PNTL sei toma medida ne’ebé todan ba sira ne’ebé maka estraga situasaun rai laran.
“Situasaun horsehik halo populasaun sente tauk tanba dalaruma ita líder sira maka sabraut. Ita maka hakarak estraga situasaun. Ita haree hodi kalan hahú hosi tuku 19:00 ba leten, estrada mamuk no ohin movimentu ema no transporte la hanesan baibain”, Lere haktuir.
Biban ne’e, Xefe Estadu hanesan Komandante Supremu F-FDTL atribui kompeténsia tomak ba F-FDTL no PNTL atu atua kualker momentu ne’ebé estraga Nasaun.
Parlamentu Nasionál liuhosi bankada Kongresu Nasionál Rekonstrusaun Timor (CNRT-sigla portugés), Partidu Libertasaun Nasionál (PLP) no Kmanek Haburas Unidade Nasionál (KHUNTO) rejeita programa ne’ebé governu aprejenta ho mosaun rejeisaun liuhosi votu a favor 35, kontra 30 no abstein 0.
Jornalista: Xisto Freitas
Editora: Rita Almeida
