BOBONARU, (TATOLI) – Timor-Leste sei hala’o sensu agrikultura, tanba ne’e Komisaun Téknika prezide husi Diresaun Jerál Estatístika, Ministériu Finansa (MF), Ministériu Agrikultura no Peska (MAP) inklui Organizasaun ba Fundu Ai-han (FAO-sigla inglés) no parseiru dezenvolvimente sira, sei rekruta enumeradór sira, supervizionádor no treinadór sira hodi fasilita treinamentu sira.
Adjuntu Sekretáriu Sensu Agrikola MAP, Quintiliano Belo, katak oras ne’e sira halo preparasaun téknika, publisidade no sei submete proposta orsamentu atividade nian bainhira sistema orsamentu nakloke hodi bele halo rekrutamentu.
“Atividade ne’ebé ami atu halo urjente liu mak rekrutamentu, iha fulan marsu nia laran. Depois rekrutamentu, halo treinamentu ba treinadór sira hodi treinu enumeradór sira i halo mós selesaun ba treinadór sira ne’ebé ita sei hili atu sai treinadór iha postu sira”, afirma Quintiliano Belo ba jornalista sira iha Suku Lahomea, Postu Administrativu Maliana, Munisípiu Bobonaru, ohin.
Adjuntu Quintiliano Belo mós hatutan rekrutamentu ne’e sei hala’o iha munisípiu 12 inklui Rejiaun Administativa Espesiál Oekusi Ambenu (RAEOA) tuir kritéria ne’ebé mak sira prepara ona.
“Kritéria sira ne’e, ida maka ema ne’e tenke mai husi suku, nune’e sira hatene rasik sira-nia suku. Ami serbisu hamutuk ho autoridade lokál i ema sira ne’e sei rekomendadu husi autoridade lokál”.
Tuir nia rekrutamentu ne’e loloos hala’o iha fevereiru ne’e nia laran tuir kalendáriu ne’ebé Komisaun Téknika Agrikola aprova antes, maibé tanba promulgasaun orsamentu tarde maka sei halo fali kalendáriu foun no aprova fali hodi bele halo rekrutamentu.
Nia mós katak sira realiza ona pilotu Sensu Agrikola iha Munisípiu ualu, suku 30 ho kompozisaun uma kain urbana porsentu 35 no rurál porsentu 65 no hatudu kuaze umakain porsentu 75 resin mak apoiu no kontente ho pilotu ne’ebé la’o iha sira-nia fatin, liliu sukat to’os no natar, tanba liuhusi pilotu refere sira hatene loloos medida kuda husi sira-nia to’os no natar.
Munisípiu sira ne’e mak Aileu, Baukau, Bobonaru, Kovalima, Ermera, Manufahi, Vikeke no RAEOA.
“Ne’e la’ós rezultadu. Maibé, tuir observasaun ne’ebé mak maioria populasaun kontente ho pilotu ne’ebé ita halo. Katak bainhira sensu agrikultura atuál la’o, sira sei apoia másimu hodi halo susesu sensus agrikultura”, dehan Quintiliano bainhira mídia sira konfirma kona-ba rezultadu prelimináriu husi pilotu ne’e.
Espetativa ba Sensu agrikola ne’e, tuir Quintiliano: “Ba Timor-Leste, ne’e sensus dahuluk, tuir FAO katak ita hakarak ka lakohi tenke halo sensu agriklutura nu’udar kritériu ida ba Timor-Leste sai nasaun avansada. Se ita laiha sensu, ita-nia dadus ne’ebé ita prepara, sientifikamente ne’e sei la rekoñese internasionalmente”.
Jornalista: Rafy Belo
Editora: Rita Almeida
