DILI, (TATOLI) – Aviaun Aéru Dili ho tipu Cessna 172, númeru rejistu 4W-AAA hosi Suai mai Dili, dader ne’e monu iha área munisípiu Likisa, Bazartete, Suku Lauhata, Pelila ka jardin eroi.
“Aviaun hetan estragu, ema na’in rua iha laran no ambulánsia transporte ona ba Guidu Valadares (ospitál)”, informa Sentru Operasaun Nasionál Polísia Nasionál Timor-Leste (PNTL), ba TATOLI via telefone, ohin.
Tuir konfirmasaun hosi Sentru Operasaun Nasionál PNTL, ema nain rua ne’e ho kondisaun di’ak. Parte ne’e seidauk bele fó sai informasaun detalla sobre kondisaun kanek kaman ka todan, tanba ekipa sei halo hela konfirmasaun iha terenu.
“Oras ida, oras rua hanesan tan, ita hatene informasaun kompleta, tanba ami-nia maluk sira iha hela terenu”, konfirma Sentru Operasaun PNTL.
Entretantu tuir nota komunikadu ne’ebé Tatoli asesu hosi jestaun Aéru Dili haktuir aviaun ho númeru rejistu 4W- AAA hetan insidente iha Kaitehu, Likisa, iha voo mai husi Suai.
Ema iha aviaun laran mak pasajeiru ida ho pilotu, nain rua ho kondisaun di’ak. Tuir prosedur, pilotu kontaktu kedas ambulánsia hodi lori pasajeiru ba halo tratamentu.
Tuir pilotu, aviaun hetan avariasaun durante sira tama ona iha área Likisa nian. Tanba ne’e maka pilotu desidi atu halo emergency landing iha rai mamuk, maibé la konsege hetan rai luan uitoan, nune’e nia desidi atu aterra iha estrada.
Maibé kait iha fiu eletrisidade nian ida iha ne’eba hodi rezulta aviaun lakon balansu, mesmu nune’e pilotu konsege hatun aviaun iha rai maran no la afeta ba komunidade nian uma. Insidente ne’e rezulta aviaun hetan estragu iha liras karuk no iha propeller.
Relasiona ho kauza ba avariasaun aviaun nian, kompañia Aéru Dili entrega tomak ba parte kompetente Aviasaun Sivíl atu halo prosesu investigasaun ba insidenti ne’e.
Ekipa Tatoli
