DILI, (TATOLI) – Governu liuhusi reuniaun Konsellu-Ministru (KM), ohin rona aprezentasaun relatóriu husi Komisaun Reforma Fiskál (KRF) no rekomenda ba Governu dalan di’ak atu halo prosesu reforma ho susesu.
Aprezentasaun relatóriu ida ne’e husi Koordenadora Reforma Fiskál, Fernanda Borges, no entrega ba ezekutivu iha nian mandatu ikus.
Ministru Estadu Prezidénsia Konsellu Ministru, Hermenegildo Augusto Cabral Pereira, hatete KM rona relatóriu kle’an husi KRF tanba dezde 2015 komisaun ne’e hala’o knaar tuir nia mandatu.
“Relatóriu ne’e identifika konstranjimentu, difikuldade ka problema iha prosesu reforma nian no rekomenda dalan ne’ebé di’ak liu hodi Governu bele halo prosesu reforma fiskál ne’e kle’an no to’o hotu ho susesu”, ministru afirma ba jornalista sira hafoin reuniaun KM iha Palásiu Governu.
“Objetivu maka atu hasai reseita doméstika ba ita-nia Estadu, ne’ebé ho aprezentasaun relatóriu ne’e Komisaun Reforma Fiskál nia mandatu hotu”.
Rekomendasaun ne’ebé hato’o husi KRF atu implementa ne’e Konsellu Ministru entrega ba Ministériu Finansa (MF) maka atu kaer knaar ne’e no MF sei aprezenta ba KM road map (roteiru) hodi MF fiar katak dalan ida ne’e maka di’ak liu atu implementa rekomendasaun sira ne’e ho susesu.
Ministra Finansa en ezersísiu, Sara Lobo Brites, hatete KRF hetan konvite husi KM, tanba mandatu KRF ne’e estabelese liuhusi rezolusaun ida iha 2015, nune’e Governu Daualuk hakarak rona husi Koordenadora Reforma Fiskál sobre rezultadu serbisu ne’ebé maka hala’o tiha ona no rona mós serbisu saida maka sei rekomenda ba Governu atu kontinua implementa bá oin.
“Rekomendasaun iha área reforma fiskál ko’alia kona-ba tributária oinsá para bele hasa’e reseita ho mós iha alfándega, ida ne’e maka ohin koordenadora mai aprezenta”, Sara relata.
Tanba mandatu Koordenadora KRF hotu maka tuir lei orgánika Governu Daualuk atribui kompeténsia iha reforma sira ne’e tantu iha tributária no jestaun finansa públika ba iha MF nia kompeténsia.
“Konsellu Ministru simu rekomendasaun sira ne’ebé koordenadora fó para entrega ba Ministériu Finansa kontinua implementa”.
Tanba ne’e iha tempu badak MF sei aprezenta fali roteiru mai KM hafoin konsolida hotu input sira ne’ebé KRF fó ho mós reforma sira seluk para bele implementa durante governasaun ida ne’e.
KRF ne’ebé kria husi Sestu Governu ne’e ho objetivu atu garante futuru nasaun nian liuhusi diversifikasaun fonte sira no asegura sustentabilidade husi finansa públika.
Jornalista: Maria Auxiliadora
Editora: Rita Almeida
