BOBONARO, 7 juñu 2019 (TATOLI)—Governu liuhosi Sekretaria Estadu Komunikasaun Sosiál (SEKOMS), sei mobiliza mídia hodi transmiti progresu dezenvolvimwntu ba pou iha área rurál.
“SEKOMS sei mobiliza mídia hanesan RTTL, Agência TATOLI no Rádiu Komunidade sira atu transmiti progresu dezenvolvimentu kona-ba ekonomia, agrikultura, turizmu no atividade kulturál ba povu,” Sekretáriu Estadu Komunikasaun Sosiál, Merício Akara, ko’alia asuntu ne’e bainhira sensibiliza programa ‘Naroman ba Suku’, iha Postu Administrativu Bobonaro, Munisípiu Bobonaro, sesta ne’e.
Nia dehan, programa ‘Naroman ba Suku’ ho intensaun atu kria interasaun entre komunidade ho autoridade, nune’e povu hotu bele informadu kona-ba prosesu dezenvolventu ne’ebé oras ne’e la’o iha rai laran tanba informasaun kona-ba prosesu dezenvolvimentu tenke to’o iha rurál.
“Komunidade ho autoridade tenke iha interasaun hodi fó hanoin ba malu no halo diskusaun,” dehan Akara.
Iha fatin hanesan, Diretor Nasionál Diseminasaun Informasaun, Estévão da Costa Belo, heteten programa ‘Naroman ba Suku’ ho intensaun atu povu hatene progresu dezenvolvimentu.
“Programa ida ne’e hosi SEKOMS oinsá ita bele hatene kualkér informasaun kona-ba progresu dezenvolvimentu,” nia dehan.
Enkuantu, Administradór Postu Administrativu Bobonaro, Rui Bere Mau Barros, husu mídia habelar tan kobertura iha área rurál.
Tuir nia, programa ‘Naroman ba Suku’ sei lansa iha 20 juñu tinan ne’e, iha Rotuto (Same) no Aileu iha Suku Liurai.
Atividade refere akompaña hosi Xefe Gabinete SEKOMS, Júlio Gonçalves. Diskusaun iha Postu Bobonaro ne’e hetan partisipasaun másimu hosi suku 18.
Jornalista: Evaristo Soares Martins
Editór: Xisto Freitas
