DILI, 30 Jullu 2019 ( TATOLI)- Padre Paróku São José Ai-Mutin, Emanuel Lelo Talok C,M.F, hatete joven husi nasaun lima iha rejiaun Sudeste Aziátiku sei partisipa sorumutu Asia East Youth Gathering (AEYG,sigla inglés) no Família Claretianu ba dala-tolu ne’ebé sei hala’o iha Dare, Timor-Leste durante semana ida hahú iha loron 5-11 agostu 2019.
Partisipante joven husi nasaun lima ne’e kompostu hosi Indonézia ema hamutuk 56, Srilanka na’in-ida, Koreia nain-haat, Taiwan na’in-lima, Hong Kong-Makau 5 no Filipina 17.
Padre Pároku dehan eventu internasionál ne’e organiza hosi kongregrasaun Claretianu iha Timor-Leste ho tema ‘The Solidarity of Christ Impels Us: Go, Sell, Share and Follow’ bazeia ba evanjellu Saun Mateus 19:16-26 no Lukas 10:25-37.
Sorumutu ne’e atu fahe solidaridade ba malu no fahe esperiénsia kona-ba dezenvolvimentu kreda no foinsa’e sira iha rejiaun sudeste Áziatiku hodi sai joven ne’ebé di’ak hodi kontribui mós ba dezenvolvimentu nasaun ida-idak.
“Ita nian joven sira husi nasaun oin-oin mai ne’ebé ita konvida no ita timoroan rasik mós sei hatudu solidaridade”, Padre Pároku ne’e dehan iha konferénsia imprensa iha Ai-Mutin, ohin.
Durante sorumutu semana ida ne’e, partisipante sira sei hala’o mós vizita bá orfonatu iha Madre Franciscana-Bidau, Fundasaun Ahisaun, orfanatu Madre Alma no orfanatu madre sira iha Ailok-Laran, Dili, hodi fó solidaridade.
Nune’e mós sei hala’o vizita bá sítiu istóriku sira hanesan João Paulo II iha Tasi-tolu, Kristo Rei no parókia Motaél.
Amu dehan tan, oradór sira iha eventu internasionál ne’e mai hosi España, Arjentina no Polónia, no oradór nasionál hanesan Amu Bispo Dioseze Dili, Don Virgílio do Carmo da Silva no reprezentante Governu Timor-Leste.
Ba soru-mutu ne’e, Komisaun Organizadora halibur ona orsamentu hosi doadór sira ho montante $40. 000 resin.
Jornalista : Natalino Costa
Editora : Maria Auxiliadora
