iklan

DILI, MUNISÍPIU

PNTL ho F-FDTL Detein Ema Nain 70 Nu’udar Grupu Rin Besi Asu Tali Be Korrente

PNTL ho F-FDTL Detein Ema Nain 70 Nu’udar Grupu Rin Besi Asu Tali Be Korrente

Bandeira grupu Rin Besi Asu Tali Be Korrente. Imajen/RTTL.EP

DILI, 17 agostu 2019 (TATOLI)-Komandu Polísia Nasionál Timor-Leste (PNTL) Munisípiu Aileu servisu hamutuk ho Komandu FALINTIL-Forsa Defeza Timor-Leste (F-FDTL), ohin, detein ema na’in 70 nu’udar membru grupu ilegál  Riin Besi Asu Tali Be Korrente (RBTBK).

Membru grupu sira ne’ebé polísia detein no halo identifikasaun iha Kuartél Jerál PNTL, Dili. Imajen/RTTL.EP

Ema hirak ne’ebé kompostu husi ferik-katuas, joven feto ho mane ne’e Polísia ho F-FDTL prende iha Aileu no halo kedas identifikasaun ba lista membru sira hodi transporta mai Dili entrega ba Polísia Nasionál Servisu Investigasaun Kriminál (PNSIK) iha Kuartél Jerál PNTL atu prosesa tuir lei.

Ema sira halibur malu iha grupu RBTBK ne’e, la’ós de’it komunidade Aileu, maibé balun husi Baukau, Likisá, Kovalima ho Bobonaru.

Polísia ho F-FDTL prende sira bainhira sira uza karreta baskulante ho xapa matrikula, 54203 ho naran Ema Kiak Moris ho Badiu no baskulante kinur xapa, 57850 ho naran Mr. Fina Mengoda.

Grupu sira ne’e  tula besi riin boot ida ne’ebé kesi metin inklui krús mean hakerek Timor Sakrifisiu, Raan Fakar inklui atributu salenda mean no mutin ne’ebé grupu sira uza atu hasa’e hamutuk ho besi riin mean iha  Aileu.

Segundu Komandante PNTL Munisípiu Aileu, Superintendente Asistente Umbelina Soares, hateten grupu ilegál ne’e hala’o atividade laiha koñesimentu ba PNTL no autoridade Aileu no grupu ne’e mós la rejista ho legál.

Nia dehan detensaun ne’e hala’o tanba antes ne’e simu informasaun ne’ebé hato’o husi komunidade katak grupu ne’e hala’o atividade iha Postu Administrativu Laulara-Auleu.

Faru ne’ebeé membru grupu Rin Besi Asu Tali Be Korrente hatais. Imajen/RTTL.EP

“Grupu Arte rituál ida ne’e ita simu informasaun husi Dili mai komandu hodi prepara ekipa depois ami koordena ho F-FDTL hodi ba simu grupu sira ne’e, tanba halo atividade ami rasik la hatene, ita identifika hanesan Grupu Riin Besi Asu laiha legalidade”, hateten Superintendente Asistente Umbelina Soares, hanesan haktuir husi RTTL, ohin.

Nia dehan, grupu sira ne’e lori besi riin, fita mean no krús, bandeira nasionál, bandeira partidu FRETILIN no bandeira organizasaun Riin Besi Asu Talin Be Korente.

Iha fatin hanesan, Administradór Postu Aileu Vila, Marcos do Santos, husu atu PNTL investiga kazu ne’e hodi prosesa tuir lei.

Marcos konsidera grupu ne’e hala’o atividade ilegál, tanba autoridade no povu rasik hakfodak bainhira haree grupu ne’e atu hahú atividade iha rai husar Timor nian iha Aileu.

“Grupu sira ne’e mai la iha koñesimentu, tanba ne’e nu’udar autoridade entrega ba PNTL prosesa tuir lei”, nia hatete.

Atributu grupu Rin Besi Asu Tali Be Korrente (RBTBK). Imajen/RTTL.EP

Reprezentante organizadór Grupu Riin Besi Asu Talin Korrente, Marcelino Martins, klarifika atividade grupu ne’e hala’o bazeia ba istória rezisténsia nian ne’ebé husi hela  bei ala sira hodi sira kontinua.

Marcelino esplika sira ba hala’o atividade atu hasa’e besi riin iha Aileu, tanba konsidera haree husi Mapa Timor-Leste Aileu reprezenta nu’udar rai husar Timor-Leste.

“Ne’e la’ós atividade foun, maibé atividade tuan haree ba istória ita nia asuwa’in funu na’in sira termina ukun án iha Aileu, tanba ne’e tenke harii riin besi asu iha Aileu nu’udar rai klaran hodi povu hatene istória ida ne’e,” nia esplika.

Oras ne’e daudauk ema hirak ne’ebé forma  grupu  ne’e sei detein hela iha Kuartél Jerál PNTL hodi hein  investigasaun.

Jornalista : Eugénio Pereira

Editór       : Francisco Simões

iklan
iklan

Leave a Reply

iklan
error: Content is protected !!