BALIBO, 08 outubru 2019 (TATOLI)-Ministériu Edukasaun (ME) presiza tau atensaun seriu ba Eskola Ensinu Báziku Filiál (EBF) Aiasa (EBF), Suku Leuhitu, Postu Administrativu Balibo, Munisípiu Bobonaro, ne’ebé hetan estragu total husi anin boot, foin lalais ne’e.
Diretór EBF Aiasa, Ruben Soares hatete, kondisaun infra-estrutura eskola nian ne’ebé naksobu total prejudika prosesu aprendizajen tanba Eskola ne’e iha aula 5 maibé 3 hetan estragu no la bele utiliza ona.
“Ami husu ba governu atu tau atensaun hodi hadi’a lalais kondisaun eskola ne’e,” hateten Roben Soares, ohin, ba Ajénsia TATOLI, iha Aiasa, Balibo, Bobonaro.
Nia parte hato’o ona situasaun ne’e ba ministériu tutela Munisípiu Bobonaro maibé seidauk iha resposta to’o agora.
Haree ba situasaun ne’e hahú, ohin, estudante primeira to’o terseiru klase, aula dadeer no kuartu to’o sestu klase, aula meudia no la hanesan ho antes ne’ebé aula hotu lao hahú iha dadeer.
EBF Aiasa ho total estudante nain 127, kompostu husi estudante feto 61 no mane nain 66, ho professor permanente nain tolu (3), kontratadu nain ida (1) no voluntáriu nain rua (2).
Jornalista : Nelson de Sousa
Editór : Francisco Simões
