DILI, 16 jullu 2020 (TATOLI) – Ekipa konjunta kompostu hosi Polísia Nasionál Timor-Leste (PNTL), Diresaun Nasionál Transporte Terrestre, Diresaun Nasionál Patrimóniu Estadu (DNPE) no Komisaun Anti-Korrupsaun (CAC) sei halo koordenasaun servisu hodi re-ativa fali operasaun konjunta iha estrada públiku ba sirkulasaun veíkulu Estadu iha loron feriadu no sábadu no domingu.
Notísia Relevante : AJAR Husu KAK Kontinua Halo Operasaun ba Veíkulu Estadu
“Operasaun la la’o ona tanba depende ba situasaun, maibé agora ekipa sira ne’e sei halo fali koordenasaun no iha ona pedidu atu halo koordenasaun karik iha nesesidade ita espera iha tempu badak ita bele tun ba terrenu hodi halo operasaun,” informa Adjuntu Komisáriu CAC, ba asuntu Prevensaun no Sensibilizasaun, Luis de Oliveira Sampaio, ohin, ba Agência Tatoli iha nia servisu fatin, Dili.
Nia hatete, operasaun ne’e hanesan forma edukasaun hodi konsensializa ajente públiku hotu utiliza sasán no fasilidade rekursu Estadu nian tuir ba fin interese públiku nian.
“Veíkulu Estadu nian uza de’it iha loron servisu segunda to’o sesta. Sé uza iha loron feriadu no sábadu-domingu tenke iha justifikasaun ka autorizasaun hosi superior,” informa Luis Oliveira Sampaio.
Nia hateten, atuasaun ba operasaun ne’e iha nesesidade sei halo periódikamente maibé karik laiha nesesidade la presiza atu kontinua.
Antes ne’e ekipa konjunta halo ona koordenasaun ho ministériu lubuk ida nune’e diresaun jerál no superior sira mak tenke toma responsabilidade hodi bele kontrola liu tan.
Adjuntu CAC ba asuntu Prevensaun no Sensibilizasaun, Luis de Oliveira Sampaio nota katak, iha operasaun konjunta durante ne’e la’o hatudu pozitivu tebes tanba sirkulasaun veíkulu Estadu iha loron feriadu komesa laiha.
Jornalista : Nelson de Sousa
Editór : Francisco Simões
Hanesan Sidadaun,
Esbosu Lei defamsaun Kriminaliza Persiza Halo Analiza liu husi Sistema Baro meter. ida ne’e tenke mai husi siadadaun hotu nia hanoin atu iha Vantazen kona ba Lei nee’ rasik. Seitor Justisa mos persiza halo Konsulta uluk ho Povo nia Hanoin sira. ita nia rai Doben ida ne’e nia to ohin loron Povo maka Sakrifika ona sira nia dedikasaun tomak depois de hetan Liberdade.