DILI, 25 agostu 2020 (TATOLI)- Klube DIT FC ho susesu konsege halakon nia adversáriu Santa-Cruz FC ho golu 2-0 durante jogu kopa FFTL époka 2020 ne’ebé realiza iha Estádiu Munisipál Dili, tersa ne’e.
Golu vitoria ba susesu klube DIT FC ne’e prodúz hosi Jogadór José Santos (7) iha minutu 59 no Lourenço Ximenes (10) iha minutu 72.
Notísia Relevante :FFTL Realiza Kopa 2020 ho Osan Rihun $ 200
Treinadór Santa Cruz FC, Olandino Alves, rekoñese frakeza ne’ebé maka nia ekipa enfreta maka jogadór avansadu.
“Ohin ne’e jogu kapas loos. Ami só lakon iha liña avansadu ba oin ami sei buka tan atu hadi’a iha lina oin nian,”dehan nia ba Tatoli, iha Estádiu Munisipál Dili.
Nia dehan ida ne’e jogu dahuluk nian, maibé iha jogu rua tuirmai optismista katak sei manán nune’e bele hakat ba faze oitavu final.
Iha biban seluk Treinadór DIT, Mial Balibata, sente satisfeitu ho rezultadu ne’ebé nia ekipa hetan maski ida ne’e la’ós sira-nia alvu.
“Kontente ho rezultadu ne’e, maibé ami nia alvu la’ós hanesan ne’e bele hetan golu barak maibé rezultadu sai mai nune’e ami simu,” dehan Balibata.
Tuir nia, save atu DIT hakat ba oitavu final sei termina ho Assalam.
“Bainhira ami atu hakat ba oitavu fináls ami tenke manán Assalam, maibé ami tenke prepara aan halo didi’ak,” hateten.
Notísia Relevante :Lalenok halakon Assalam ho 2-0
Jornalista : Hortencio Sanchez
Editór : Agapito dos Santos
