DILI,13 Janeiru 2021 (TATOLI)—Ministériu Saúde (MS) liuhosi koordenadora Jerál Komisaun Nasionál COVID-19, Odete da Silva Viegas, klarifika ba públiku katak ema na’in haat ne’ebé mate tutuir malu durante semana ida iha munisípiu Baucau tanba sofre moras króniku la’ós mate tanba Covid-19.
MS klarifika informasaun ne’e relasiona ho rumoris ne’ebé espalla iha média sosiál iha loron hirak nia laran katak ema na’in haat ne’e mate tanba COVID-19.
“Informa ba públiku kona-ba rumoris ne’ebé iha média sosiál no ita boot jornalista sira husu kona-ba pasiente na’in haat ne’ebé mak mate iha iha munisípiu Baucau na’in tolu iha Bucoli no na’in ida iha Buruma. Sira mate tanba ho moras króniku no sira la’ós mate tanba COVID-19,’’ Odete hateten ba jornalista sira iha Palasiu Sinzas, Caicoli, kuarta ne’e.
Pasiente na’in tolu ne’ebé mak mate iha Bucoli, na’in rua ho moras krónika hipertensaun no ida ho moras komplikadu hanesan hipertensaun no diabetes.
Enkuantu, pasiente ida seluk ne’ebé mate iha Buruma, Odete esplika, nia sofre rins.
“Atu informa katak, pasiente sira ne’e halo tratamentu iha ospitál no mós sentru saúde iha Baucau. infelizmente sira ne’e la halo tratamentu regulár,” Odete klarifika informasaun ho loloos.
Atu justifika loloos preokupasaun ne’e, Ministériu Saúde liuhosi ekipa vizilánsia tun direta bá terrenu hodi foti amostra no amostra sira ne’e hatudu rezultadu negativu.
“Sira ba foti duni amostra iha mate isin ida ne’e rasik no mate isin na’in tolu seluk hakoi ona, entaun uza mós amostra família nian hodi bele identifika katak, sira ne’e iha duni kontaktu direta ba ema ne’ebé mak mate. Maibé, sira nia rezultadu negativu hotu,’’ tenik tan.
Jornalista: Felicidade Ximenes
Editór: Agapito dos Santos
