OÉ-CUSSE, 23 Juñu 2021 (TATOLI)—Diretór Obra Públika (MOP) Rejiaun Administrativa Espesiál Oé-Cusse Ambeno (RAEOA), Kandido dos Reis Amarál, hateten MOP liuhosi Dirasaun Infraestrutura kria polítika Community Based Maintenance (CBM) hodi fasílita insentivu ba komunidade atu hadia rasik estrada iha área rurál.
Notísia Relevante: MOP RAEOA prevee rihun $42 mellora estrada foun iha Oésilo
Kandido dos Reis Amarál hateten, pólitika CBM ne’e hala’o kada tinan bainhira komunidade finaliza kolleta ai-han bázika iha to’os, nune’e Governu fasílita insentivu nu’udár maneira ida atu eduka sira hanesan partisipasaun kuidadu estrada rasik ne’ebé organiza diretamente hosi líder komunitáriu.
“Programa CBM fulan ida liu-bá to’o ohin, servisu kontinua la’o. Organiza komunidade atu servisu ba sira nia estrada rasik iha área rurál sira. Ida-ne’e hanorin komunidade oinsá hadi’a no kuidadu ita-nia dalan ba sirkulasaun loro-loron. Autoridade fó apoiu ba sira hanesan $3 kada loron. Ida-ne’e la’ós atu selu maibé intensivu de’it tanba sira labele ba han iha uma, entaun osan ne’e sira bele hola hahan,” Diretór Obra Públika RAEOA ne’e hateten ba Agência TATOLI, iha nia servisu fatin, bairu Santa Rosa, suku Costa, sub-rejiaun Pante Makasar, kuarta ne’e.
Komunidade balun, nia dehan, la’ós taka de’it estrada ku’ak maibé sira iha inisiativa rasik loke estrada foun ho objetivu bele fasilita transporte sira atu halo sirkulasaun ho kondisaun di’ak.
“Community Based Maintenance (CBM) ne’e ita hala’o iha suku 18 suku iha territoriu rejiaun ne’e. Só suku balun mak nia operasaun uitoan de’it hanesan iha suku Costa, suku Lalisuk, suku Nipani no suku Cunha tanba suku hirak ne’e iha sidade laran. Maibé kuaze suku 18 ne’e hetan hotu no fó apoiu atu kontribui hadi’a rasik estrada iha área rurál,” nia hateten.
Entretantu, nia informa, montante osan ba programa CBM ne’e hamutuk rihun $75 ne’ebé bele hadi’a estrada kilómetru 200-resin fahe ba sub-rejiaun Oésilo, Pasabe, Nitibe no sub-rejiaun Pante Makasar.
Jornalista : Abilio Elo Nini
Editor : Cancio Ximenes
