DILI, 24 juñu 2021 (TATOLI)—Primeiru-Ministru, Taur Matan Ruak, hateten Timor-Leste nia pozisaun votu abstensaun ba situasaun Myanmar sai hanesan lisaun ba futuru.
“Ha’u hanoin país ida Demokrátiku katak opiniaun sidadaun nian importante tebes, nune’e Guvernu rejista preokupasaun hotu. Hanesan ha’u dehan ne’e, votasaun halo tiha ona agora hasai lisaun ba futuru de’it,” Taur Matan Ruak hateten ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.
Notísia Relevante: MNEK: “vota abstensaun ba situasaun Myanmar tuir konsisténsia polítika externa”
Xefe Governu hatutan, votu abstensaun ne’e liu tiha ona maibé la subtitui ba valór no prinsípiu ne’ebé Timor-Leste defende tanba kontempla ona iha Konstituisaun RDTL.
“Votasaun ne’e ita-nia votu liu tiha ona maibé la subtitui valór no prinsípiu ita ho ita-nia nasaun defende, tanba kontempla iha ita-nia Konstituisaun rasik, maibé votu ita-nian ne’e halo tiha ona hanesan faktu ida konsumadu. Soké votu ne’e, nia la subtitui valór no prinsípiu ne’ebé Timor-Leste komunga hanesan demokrásia, respeitu direitu umanu, rekonsiliasaun no solusaun pasífika ba problema sira-ne’ebé la utiliza violénsia sira. Timor-Leste defende ida-ne’e,” Xefe Governu hateten.
To’o agora, Primeiru-Ministru Taur Matan Ruak hateten, iha ámbitu ukun rasik aan ne’e prinsípiu no valór hirak ne’e sei uza nafatin tanba lori raan no mate mak hodi sosa.
Entretantu Portavós Movimentu Brigada Xanana Unidade Asaun no Progressu, Rogerio da Cruz, hateten Timor-Leste nia votu abstensaun ba Resolusaun Konflitu iha Myanmar ne’e hatudu katak Timor-Leste lakon memória solidaridade internasionál iha prosessu luta ba ukun rasik aan.
Movimentu ne’e lamenta tebes ho desizaun ne’ebé Timor-Leste foti hodi fó votu abstensaun ba situasaun Myanmar, tanbá kontra Konstituisaun RDTL, artigu 10, alinea 1.
“Iha konstituisaun artigu 10, alinea 1 ne’e hateten Repúblika Demokrátika Timór-Leste mós solidáriu ho povu hotu-hotu ne’ebé luta ba libertasaun nasionál,” Rogerio da Cruz hateten ba jornalista sira liuhosi konferénsia imprensa, iha Tasi-Tolu, Dili, kinta ne’e.
Jornalista : Osória Marques/Nelia Fernandes
Editór : Cancio Ximenes
