iklan

DESPORTU

Manán 3-2, Ultramar lidera provizóriu tabela klasifikasaun

Manán 3-2, Ultramar lidera provizóriu tabela klasifikasaun

Jogadór Nagarjo FC hadau malu bola ho Jogadór Atletico Ultramar kamizola metan iha joga divisaun II, Liga Futeból Timor-Leste, kuarta 20 Otubru 2021, iha kampu Demokrasia Dili, Imajen Tatoli/António Gonçalves

DILI, 20 outubru 2021 (TATOLI)– Ekipa Segunda Divizaun Atletico Ultramar, iha kuarta ne’e, susesu iha jornada daruak hodi manán Nagarjo FC ho rezultadu 3-2, iha jogu kontinuasaun Liga Futeból Timor -Leste (LFTL), iha kampu Federasaun Futeból Timor -Leste (FFTL) Dili.

Ho vitória ne’e Ultramar lidera kedan tabela klasifikasaun provizóriu ho pontu haat tanba iha jornada primeiru ekipa ne’e empate ho Lika-Lika 2-2. Enkuantu, Nagardjo obrigadu tenke hela ho pontu 0 tanba iha jornada primeiru lakon ho Emanuel FC 2-1.

Iha jogu primeiru parte, Nagarjo hala’o jogu ho ofensivu atu hatama golu lais, maibé Ultramar jogu ho modelu defensivu atu hatama golu bainhira seidauk kona iha alvu.

Jogadór Nagarjo FC halo selebrasaun bainhira hatama golu joga kontra Atletico Ultramar iha joga divisaun II, Liga Futeból Timor-Leste, kuarta 20 Otubru 2021 iha kampu Demokrasia Dili, Imajen Tatoli/António Gonçalves

Ho jogu moris ne’ebé Nagarjo halo fó duni rezultadu di’ak ba ekipa ne’e tanba iha minutu 21 jogadór Jorge Alves (21) konsege lansa ona golu dahuluk hodi muda rezultadu ba 1-0.

Ho golu ne’e, Ultramar la nonok de’it, nafatin hatudu jogu bonito, maski Nagardjo domina liu bola. Ho situasaun ne’e halo treinadór Ultramar, Moises da Silva la hakmatek iha kampu ninin hodi orienta nia jogadór-sira hodi muda estratéjia ba bola long.

Mudansa ne’e fo duni prova ba Ultramar tanba iha minutu 24 jogadór, Florindo Soares (17) konsege responde golu liuhosi sutu ho velosidade makas ne’ebé guarda rede Nagardjo, Cesar de Jesus, labele salva hodi muda eskore ba 1-1. 

Rezultadu provizóriu empate ne’e, halo jogu rame liután ho emosaun hosi jogadór ekipa rua, nune’e  jogadór Ultramar Bonifacio Cabral (10) tenke hetan kartaun mean tanba halo erru ne’ebé makas hasoru jogadór Nagardjo Antonio Ximenes. Hosi desizaun ne’ebé fó ba jogadór Ultramar ne’e mak termina ona minutu primeira parte.

Dolar ba segunda parte ekipa rua nafatin hala’o jogu bonito, maibé Nagardjo hatudu nia kapasidade jogu liuhosi jogadór Julião Ximenes (7) lansa tan golu da-ruak hodi lidera provizóriu jogu ho eskore 2-1.

Nagardjo kontente makas tanba hanoin sira bele manan ona jogu ne’e, kompara ho sira nia jogadór na’in 11 maibé Ultramar hela de’it jogadór 10 mak iha kampu laran tanba ida hetan ona kartaun mean.

Jogadór Nagarjo FC hadau malu bola ho jogador Atletico Ultramar. Imajen Tatoli/António Gonçalves

Maski ho jogadór na’in 10, Ultramar la lakon esperansa no nafatin hatudu jogu ho kalma atu bele manan jogu ne’e. Esperansa ne’ebé Ultramar iha sai realidade tanba iha minutu 81 jogadór Arcenio Amaral (2) responde ona golu ida hodi halo rezultadu ba 2-2.

Ekipa Nagardjo hahú lansa kontra no atake makas, maibé laiha kbiit tanba Ultramar ho tékniku ne’ebé makas, nune’e iha minutu 88, jogadór Lexi Atok prodús tan golu ida hodi hametin rezultadu ba 3-2.

Hafoin hatama golu, jogadór Lexi Atok halo erru iha kampu laran obrigadu árbitru fó kedan kartaun mean hodi hamenus tan Ultramar nia jogadór hela na’in-sia iha kampu laran.

Jogu ne’e, dirije hosi árbitru Romario Tety, Juiz liña, Antonio de Carvalho no Henrique Pereira no árbitru rezerva Januario Salsinha.

Notísia relevante: Abertura Liga Timor-Leste , Porto Taibesi manán Zebra FC 1-0

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!