OÉ-CUSSE, 26 outubru 2021 (TATOLI)— Estudante na’in 500 hosi Eskola Bázika Sentrál (EBC, sigla portugés) Palaban, iha Rejiaun Administrativa Espesiál Oé-Cusse Ambeno (RAEOA) preparadu simu vasina Pfizer.
“Dadus estudante atu simu vasina Pfizer ba prevensaun COVID-19, iha EBC Palaban iha estudante na’in-500 maka preparadu atu simu vasina,” Diretór EBC Palaban, Vincencio Cono, informa ba Agência TATOLI, iha Palaban, tersa ne’e.
Dadus totál hosi estudante na’in 500 ne’e entrega ona ba autoridade RAEOA liuhosi Sekretaria Rejionál ba Asuntu Edukasaun Solidariedade Sosiál no Inkluzaun hodi entrega ba Sekretaria Rejionál ba Asuntu Saúde, nune’e bele hatene dadus ne’ebé ba kada eskola submete ona molok ba partisipa iha programa vasinasaun.
Maske submete ona dadus ba autoridade kompetente maibé nu’udar responsável másimu iha EBC Palaban sei koordena no konsellu pais, hodi divulga informasaun ba inan-aman sira hafoin autoriza estudante simu vasina Pfizer.
“Ami informa verbalmenta de’it liuhosi estudante sira atu hato’o ba inan-aman kona-ba identifikasaun dadus idade 12-17, maibé ami sei konvoka reuniaun alargada iha eskola filiál perténsia ba agrupamentu, depois ba terseiru siklu nian, nune’e bele toma responsabilidade entre serbisu saúde edukasaun ho inan-aman hamutuk ho eskola,” nia katak.
Entretantu, totál estudante iha Eskola Bázika Sentrál (EBC) Palaban hamutuk na’in 789 ho totál profesór hamutuk na’in 27 inklui guarda na’in-rua.
Notísia relevante: Estudante idade 12-17 rihun 11 iha RAEOA preparadu simu vasina Pfizer
Jornalista : Abílio Elo Nini
Editór : Evaristo Soares Martins
