OÉ-CUSSE, 11 novembru 2021 (TATOLI) — Sekretária Rejionál ba Asuntu Edukasaun no Solidariedade Sosiál no Inkluzaun, Avelina da Costa, husu foinsa’e sira atu uza opurtunidade aprende sai joven motivadór hodi hamosu ideia inovativu iha sosiedade.
Nia dehan, juventude bele envolve-an másimu iha ba prosesu dezenvolvimentu iha RAEOA tenke partisipa ativu iha prosesu dezenvolvimentu tomak, tanba joven mak patrimóniu futuru nasaun nian.
“Iha era globalizasaun mundu dijitál, iha kompetisaun oinoin, entaun juventude sira tenki firmi iha prinsípiu presiza karáter ativu, karáter rasik, presiza buka hatene, inovadór partisipativu, envolve iha prosesu dezenvolvimentu iha setór oinoin,” Avelina da Costa, ko’alia asuntu ne’e iha semináriu ne’e, kinta ne’e.
Juventude nu’udar futuru nasaun, presiza neutralidade partisipa iha prosesu dezenvolvimentu iha RAEOA no tau prioridade ba interese komún, tanba juventude mak pensadór, hamosu idea brillante, presiza lé barak iha livru, nune’e bele sai inovadór, oragnizadór, motivadór.
Nune’e mós joven tenke karatér analítiku ba planeamentu no presiza halo monitorizasaun ba prosesu tomak iha ne’ebé la’o iha RAEOA.
Entretantu, Sekretáriu Rejionál ba Asuntu Saúde, Manuel da Costa, husu juventude sira hamutuk luta dala ida-tán kontra pandemia COVID-19.

“Mai ita hamutuk luta dala ida-tán kontra pandemia COVID-19, juventude sira tenke sai autór prinsipál atu luta kontra informasaun hoax hodi prevene moras COVID-19 iha nasaun Timor-Leste,” nia fó hanoin joven sira iha RAEOA.
Jornalista : Abílio Elo Nini
Editór : Evaristo Soares Martins