DILI, 17 novembru 2021 (TATOLI)-Instituto Camões liuhosi Projetu “Konsultóriu Língua ba Jornalista (CLN, sigla portugés)” ho Sekretariu Estadu Komunikasaun Sosiál (SEKOMS), atribui sertifikadu ba profisionál komunikasaun sosiál na’in-71, ne’ebé mak termina ona formasaun lian-portugés.
Formandu na’in-71, kompostu hosi kursu nivél báziku A2 na’in-17, A2+ na’in 27 no nivél B2 ho ema na’in-20 ne’ebé partisipa kursu durante oras 50 to’o 200.
Jornalista ho profisionál komunikasaun sosiál hirak ne’e hala’o knaar iha Ajénsia notisioza Timor-Leste ka TATOLI,I.P, Rádiu Televizaun Timor-Leste, Empreza Públika, Grupu Média Nasionál (GMN), Jornal INDEPENDENTE, Dili Post, Rádiu Komunidade Comoro (RCC, sigla portugés), média Online Loluwari, asesór imprensa Governu Timor-Leste nian.
Serimónia entrega sertifikadu ne’e hala’o diretamente hosi Sekretáriu Estadu Komunikasaun Sosiál, Merício Juvinál dos Reis ‘Akara’, akompaña hosi Embaixadór Portugál iha Timor-Leste, José Pedro Machado Veira, Prezidente Camões no Diretór Sentru Formasaun Téknika Komunikasaun (CEFTEC), Rafael da Silva Freitas.
“Ita boot sira nia partisipasaun iha formasaun importante tebes atu hakerek notísia iha lian Portugés ho di’ak, tanba informasaun hosi formadora portugés-sira katak maioria jornalista mak hakerek notísia portugés di’ak ho 80% ba leten ona. Ha’u husu ita boot sira mantein nafatin hodi fó orgullu ida ba imi iha profisaun jornaliszmu,” Mericio Juvinál dos Reis “Akara” hateten iha ambitu fahe sertifikadu iha salaun sentru kulturál Embaixada Portugál, kuarta ne’e.
Iha biban hanesan, Embaixadór Portugál iha Timor-Leste, José Pedro Machado Veira, hato’o parabéns ba formandu-sira no husu atu kontinua aprende nafatin hodi mellora hakerek notísia-sira lian Portugés.
“Ita boot-sira simu sertifikadu. La’ós iha ne’e de’it tenke aprende nafatin atubele ko’alia lian-portugés ho di’ak, oinsá atu hakerek ba notísia. Ha’u haree iha TATOLI hakerek ona notísia ho lian-portugés ida ne’e rezultadu mós hosi formasaun sira ne’e,” Embaixadór Portugál ne’e enkoraja.
Projetu Konsultóriu Língua ba Jornalista sira husi rezultadu kooperasaun entre Governu Timor-Leste no Portugal ne’ebé mak hahú iha tinan 2016.
CLJ nu’udar projetu formasaun lian portugés ba jornalista timoroan sira, parseria ida entre Institutu Camões no SEKOMS ho objetivu jerál mak forma profisionál komunikasaun sosiál timoroan sira ba transmisaun informasaun fidedigna ka públiku bele fiar iha língua portugeza hodi kontribui ba aumenta literasia mediatika nian, ekonómiku-finanseira no jurídika, promove ka fomenta koñesimentu jerál populasaun nian.
Benefisiáriu direta ba projetu ne’e mak jornalista timoroan sira ne’ebé haknaar aan iha órgaun komunikasaun sosiál sira, tantu imprensa elektroníka, online inklui asesór imprensa Governu Timor-Leste nian.
Jornalista : Hortencio Sanchez
Editór : Florencio Miranda Ximenes
