BAUCAU, 07 abríl 2022 (TATOLI) – Komandu FALINTIL-Forsa Defeza Timor-Leste (Falintil-FDTL) rekomenda ba Ministériu Defeza atu realiza akordu bilaterál ho Estadu Unida Amérika hodi ajuda estudu harii komponente aeréu iha Timor-Leste.
Xefe Estadu Maiór Jenerál (XEMG, sigla portugés) FALINTIL-FDTL, Tenente Jenerál Falur Rate Laek, manifesta intensaun ne’e tanba komandu hahú planeia iha tinan oin tau orsamentu ba dezenvolve komponente aeréu hosi faze ba faze to’o tempu naruk.
Komandu FALITNIL-FDTL sei hato’o pedidu formál ba Ministru Defeza Filomeno Paixão, atu halo akordu formál entre governu Timor-Leste no EUA iha área defeza liuliu koperasaun téknika militár atu kapasita rekursu umanu no materiál.
“Komandu prefere EUA atu fó apoia tomak bele dezenvolve komponente aeréu tantu iha formasaun rekursu umanu no iha materiál hodi ajuda halo estudu no planeia ba dezenvolvimentu komponente refere iha futuru,” Tenente Jenerál Falur Rate Laek hateten bainhira partisipa iha inaugurasaun armazein aeroportu Baucau, kinta ne’e.
Tenente Jenerál akresenta, ho akordu refere reforsa liután forsa rua nia kooperasaun iha futuru liuliu ba formasaun ezersísiu militár, konferénsia no semináriu sira iha nível bilaterál no multilaterál tantu rejionál no globál.
Falur garante oragaun soberania hanesan governu, tribunál, parlamentu nasionál no liuliu prezidenti repúplika nu’udar komandante supremu sei kumpri kompromisu atu harii komponente aeréu ne’ebé Importante tebes hodi fó apoia iha situasaun klamidade no dezastre naturál.
“Komandu FALINTIL-FDTL hatene no rekoñese jestu ida-ne’e sei la haluha iha istória tomak,” Falur argumenta.
Ministru Defeza Filomeno Paixão de Jesus, sei koordena ho Primeiru Ministru hodi hato’o rekomendasaun hosi F-FDTL, Falur Rate Laek kona-ba kooperasaun entre governu Timor-Leste ho EUA iha área militár.
“Ami sei hato’o ba Primeiru Ministru atu tur ko’alia deskute antes atu ko’alia sai ba amérikanu sira,” Filomeno Paixão akresenta.
Jornalista : Natalino Belo
Editór : Evaristo Soares Martins
