DILI, 23 abril 2022 (TATOLI)–Perma Kultura Timor-Leste (PERMATIL) konsege reabilita no hamoris hikas bee-matan 300-resin iha territóriu Timor-Leste liuhosi apoiu masimu hosi komunidade, autoridade lokál, lia-na’in inklui padre sira hosi igreja katólika.
Notísia Relevante: Salva Dili hosi dezastre, MOP apresia PERMATIL konserva bee-moos iha Dare
Diretór Ezekutivu PERMATIL, Ego Lemos agradese ba komunidade liu-liu ba joven, xefe suku, lia-na’in inklui parte igreja ne’ebé kopera ona ho PERMATIL iha aldeia 200-resin iha territóriu nasionál no hakarak apoiu servisu voluntariamente ba prosesu konservasaun bee-moos iha Timor-Leste liuhos kria debu.
“Kria debu iha Timor ita la sura. Iha suku Dare de’it hamutuk 70 ona no hosi dadus 2018 to’o 2021 nian, iha bee-matan 300-resin mak konsege hamoris fila-fali,” Ego Lemos hateten ba jornalista sira iha aldeia Fatsuka, suku Dare, sesta ne’e.
Meius hodi hamoris hikas be’e matan hirak ne’e mak hanesan rehabilita debu natural sira; kria fali debu buatan; halo travasaun ba kadalak sira inklui kuda aihoris sira hodi konserva be’e no rai nune’e kada tinan rezultadu diak mak mosu.
PERMATIL mós hakarak atu prosesu konservasaun rekursu bee ne’e bele habelar liután iha aldeia sira iha Timor laran tomak, tanba tuir PERMATIL nia hare’e kada tinan inan-feton no labarik sira mak sofre liu ba lalin bee-moos iha tempu bai loron naruk.
“Bainhira ita hamoris fali bee-matan sira bele ajuda ona inan-feton no labarik oan sira atu labele sofre lalin bee-moos iha fatin dook no hosi ne’e ita bele kria ambiente saudavél no amigavél,” nia esplika.
Ego Lemos mós espera, servisu ne’ebé PERMATIL halo ona bele hetan apoiu hosi parte Governusentrál nune’e habelar servisu hamutuk iha territóriu tomak atu bele prevene risku dezastre sira iha futuru.
Ministru Obrás Públika, Abel Pires, iha fatin hanesan mós kompremete katak sei utiliza ideia di’ak husi PERMATIL nian atu bele aplika iha fatin risku sira-ne’ebé kada tinan sempre hasoru problema inundasaun no rai halai iha tempu udan.
Nia hateten, benefísiu indireta ba MOP liuhosi konservasaun bee ne’e mak redús bee atu sobu uma, estrada no ponte sira no bele ajuda Governu poupa osan barak no la presiza halo rekuperasaun ne’ebé sei la akontese tan.
“Hau agradese, ami-nia esforsu sei kmaan kuandu ita la’o hamutuk ho ita nia parseiru sira. Tinan ida-ne’e ita foku lai iha Dili tanba populasaun barak no ida-ne’e ita-nia kapitál maibé tama tinan oin ne’e ita ba ona fatin seluk hanesan Mota Dilor, Mota Welolo no Loes no foho sira-nia leten ita sei halo hanesan ne’e,” nia dehan.
Governante afirma, bainhira planu konservasaun bee-moos implementa iha territóriu nasionál sei presiza kooperasaun PERMATIL hodi apoiu formasaun ba komunidade iha área ne’ebé determina ona.
Jornalista : Cidalia Fátima
Editór : Cancio Ximenes
