DILI, 19 maiu 2022 (TATOLI)—Prezidente Repúlika (PR) períodu 2022-2027, José Ramos Horta, kompromete sei konvoka diskusaun ho parte hotu hodi kria konsensu ba dezenvolvimentu nasaun.
“Ba partidu sira hotu iha Parlamentu Nasionál no sira ne’ebé laiha Parlamentu, ha’u sei buka no sempre tun ba ita-nia Uma-fukun, Uma-sagradu para halo diálogu. Ha’u-nia odamatan mós sei loke para simu imi, ita ko’alia tantu formál ka informál para ita buka dalan konsensu nasionál hodi hametin dame iha rai ida-ne’e no hodi hamenus problema kiak,” Horta hato’o diskursu iha serimónia investidura, iha Tasi-tolu, kinta ne’e.
Notísia relevante: Ramos Horta kompromete sai Prezidente Repúblika ba povu tomak
Aleinde ne’e, PR emposadu agradese ba dedikasaun no nafatin husu konsellu ba Prezidente Repúblika sesante, Francisco Guterres ‘Lú Olo’ durante nia mandatu.
“Ha’u agradese ba Prezidente sesante, Francisco Guterres ‘Lú Olo’, nia espoza no nia família tomak, ba servisu ho dedikasaun ne’ebé entrega ba rai Timor-Leste, bainhira nia prepara-an atu ba halo atividade seluk, ha’u bele konta ho ita-boot (Lú Olo) para fó konsellu ba ha’u no ajuda ha’u iha tinan-lima mai ne’e. Ita-boot mós bele konta ho ha’u, bainhira presiza karik, dala ruma ko’alia de’it ou dala ruma presiza buat ruma, tantu pesoál no la polítiku, ha’u sempre prontu,” nia akresenta.
Biban ne’e, PR eleitu agradese servisu kolaborativu hosi órgaun sobaranu sira inklui konvidadu ne’ebé partisipa iha serimónia investidura.
“Ha’u-nia agradesementu ba vizitante hotu ne’ebé hosi dook partisipa pose, ha’u-nia agradesementu no saudasaun ba Primeiru-Ministru, Taur Matan Ruak, ba nia servisu, Prezidente Parlamentu Nasionál no eis titulár hotu,” nia dehan.
Jornalista : Antónia Gusmão
Editora : Julia Chatarina
