INKLUZAUN SOSIÁL, NASIONÁL

Benefisiáriu 4.000 rejistu ona ba programa “bolsa da mãe jerasaun foun”

Benefisiáriu 4.000 rejistu ona ba programa “bolsa da mãe jerasaun foun”

Inan Feton isin rua sira bainhira ba iha Centru klinika Formosa hodi Cek up ba sira nia bebe, Tersa 5 Otubru 2021.Imaje Tatoli/Antonio Goncalves

DILI, 04 jullu 2022 (TATOLI)—Diretór Nasionál Asisténsia Sosiál (DNSA), Lucas Tois, informa tuir dadus hosi munisípiu Ainaro, Bobonaro no RAEOA ne’ebé tama ona iha sistema ne’e hatudu katak ema besik 4.000 mak rejistu ona ba programa “bolsa da mãe jerasaun foun”.

Notísia Relevante: MSSI rekomenda DNSRN fasilita BI ba benefisiáriu “bolsa da mãe jerasaun foun”

“Dadus tama ona iha sistema maibé ha’u mak seidauk asesu tanba parte IT Katalpa seidauk link mai ha’u, maibé dadus ne’ebé iha katak ema besik 4.000 mak rejistu ona ba programa ‘bolsa da mãe jerasaun foun’. Dadus ne’e mai hosi munisípiu Ainaro, Bobonaro, no Rejiaun Administrativa Espesiál Oé-Cusse Ambeno (RAEOA) ne’e,” Lucas Tois informa ba Agência TATOLI, iha nia knar fatin, Caicoli, Dili, segunda ne’e.

Hosi númeru ne’e, nia dehan, inan isin-rua no labarik hosi tinan 0-3 mak barak no ema ho defisiénsia sira iha naton mak rejistu ona.

“Mezmu ha’u la asesu ba sistema rejistu programa bolsa da mãe jerasaun foun nian, maibé ha’u fiar katak ita iha progresu boot tanba haree hosi númeru ne’ebé sira relata ne’e boot liu,” nia dehan.

Hakarak ka lakohi, nia dehan, MSSI sei halo pagamentu ba programa refere iha fulan jullu ne’e tanba bainhira rejistu kompleta fulan mak tenke halo pagamentu ba benefisiáriu sira.

“Pagamentu ne’e ita halo akordu ho Banku Nasionál Komérsiu Timor-Leste (BNCTL) ne’ebé sei halo pagamentu ba benefisiáriu sira iha munisípiu Ainaro Bobonaro no RAEOA Telkomcel mak sei selu,” nia dehan.

Diretór Administrasaun no Finansa MSSI, Rui Manuel Gago Exposto, hateten, programa refere sei implementa iha territóriu nasionál iha tinan 2024 no iha tinan ne’e Governu sei finaliza rejistu ba programa ‘bolsa da mãe jerasaun foun’ iha Timor-Leste.

“Tanba iha kompromisu katak programa bolsa da mãe jerasaun foun ne’e di’ak, tan ho nia objetivu atu redús probreza, atu redús má nutrisaun no mós raes badak iha Timor – Leste inklui estimula ekonómia família, nune’e Governu hanoin no esforsu atu bele aselera no implementa programa ne’e iha nivel territóriu nasionál iha 2024,” nia informa.

Governu aloka osan ba programa bolsa da mãe jerasaun iha 2022 nian ne’e kuaze millaun $6,9.

Notísia Relevante: Pesoál rejistu “Bolsa da Mãe Jerasaun Foun” hahú rejista inan isin-rua

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!