DILI, 07 jullu 2022 (TATOLI)–Primeiru-Ministru (PM), Taur Matan Ruak, hateten, nia parte fó ona orientasaun ba Ministru Finansa (MF), Rui Augusto Gomes, atu konsentra aumenta reseita, nune’e labele dependénsia ba fundu petrolíferu.
“Tuir ha’u-nia hanoin no ha’u hateten ba Ministru Finansa katak lalika konsentra dehan fundu hotu ona, ne’e la hateten mós fundu ne’e sei hotu, konsentra maka oinsá aumenta reseita, ida-ne’e maka importante. Para ita orienta ne’e la’ós ba fali negativu, maibé orienta ba ida pozitivu,” PM Taur hateten hafoin ramata reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Notísia relevante: OJE 2022 akumula millaun $150 hosi reseita doméstika
Tanba ne’e, Xefe Governu husu ba povu katak, hanesan sidadaun, ita hatene katak independente fundu ida-ne’e hotu ka la hotu, nasaun ida-ne’e sei la naben.
“Povu ida-ne’e sei la mate hotu, enkuantu ita la mate ita tenke prodús para han. Ne’ebé ha’u iha esperansa, fiar katak Timor sei la mout. Uluk ami funu ne’e laiha ema ida mak fiar katak ami manán, tanba dehan kilat laiha, ema laiha, rai kiik, ema hotu blokeia. Tanba ne’e Timor sei la independente, maibé tinan 24 Timor ukun-an, daudaun mós dehan osan sei laiha maibé osan laiha mós ita sei la mate, ita sei moris, ne’ebé ita timor-oan ha’u hanoin konsentra ba oinsá mak lori Timor ba oin no lori saida mak sustenta, ida-ne’e Governu haree hela ida-ne’e atu oinsá mak ita kontrola ita-nia rekursu sira, la’ós de’it kontrola maibé buka alternativa, buka opsaun ne’e mak importante,” nia otimista.
PM argumenta, hakarak ka lakohi fundu petrolíferu loron ida sei mout, hanesan kompara karik iha uma, inan-aman halo natar no to’os.
“Ezemplu foos saku 100 de’it, maibé ita iha uma kada tinan ne’e ema aumenta, kuandu nune’e han la to’o tinan, entaun ita-nia nasaun mós hanesan, ema aumenta, nesesidade aumenta, gastu aumenta,” nia akresenta.
Bazeia ba relatóriu trimestrál dahuluk Banku Sentrál Timor-Leste (BCTL, sigla portugés) ne’ebé termina iha 31 marsu 2022, aprezenta montante ikus fundu petrolíferu biliaun $19,12.
Kuaze tinan barak nia laran, reseita doméstika kada tinan la liu $200, ne’ebé montante ne’e la to’o atu kobre kategoria saláriu no vensimentu iha Orsamentu Jerál Estadu ho montante kada tinan entre millaun $220 to’o millaun $225.
Jornalista : Antónia Gusmão
Editora : Julia Chatarina
