DILI, 23 Jullu 2026 (TATOLI)—Prezidente Institutu ba Defeza Direitu Labarik ka Instituto para a Defesa dos Direitos da Criança (INDDICA), konsidera Agência Notisioza Timor-Leste (TATOLI, I.P) tenke sai matan, tilun no ibun ba sosiedade hodi kontribui ba dezenvolvimentu iha Timor-Leste.
Prezidente INDDICA, Dinorah Granadeiro, hato’o parabéns ba Tatoli, I.P tanba servisu ne’ebé mak durante ne’e mídia Tatoli, I.P halo kontribui tebes ba iha dezenvolvimentu Estadu ida-ne’e nian.
“Liuliu oinsá mak bele lori informasaun ne’ebé mak loos no informasaun ne’ebé mak ita-nia sosiedade sira presiza hatene, aleinde liga ho programa Governu nian maibé mós ho situasaun atuál ba dezenvolvimentu iha nasaun ida-ne’e,” Prezidente INDDICA ne’e hateten ba Agência Tatoli iha nia kna’ar fatin Kaikoli, ohin.
Tanba ne’e, nia enkoraja nafatin ba mídia Tatoli atu kontinua ezerse nia servisu ho independentemente no kriativu hodi sai hanesan matan, tilun no ibun ba iha sosiedade Timor laran tomak.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu- Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste ne’ebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, independente, inzenta, klareza no nafatin iha integridade no mós kredibilidade.
Jornalista : Alexandra da Costa
Editór : Cancio Ximenes
