VIQUEQUE, 16 jullu 2022 (TATOLI)–Partidu Frente Revolusionáriu Timorense (Fretilin) apoia pakote emerjénsia hodi distribui apoiu umanitária ba vítima dezastre naturál sira iha Viqueque.
Sekretáriu jerál partidu Fretilin, Marí Alkatiri, hateten apoia umanitária ne’e Fretilin kontribuisaun ba vítima klamidade iha Viqueque ne’ebé akontese loron 29 fulan-juñu 2022.
Notísia Relevante: Dadús provizóriu: uma 170 iha área Beaço afetadu inundasaun
“Ha’u mai entrega ba munisipál hodi koordena ho komisaun polítika munisípiu nian, distribui ba ita-nia vítima afetadu dezastre naturál iha Viqueque. Maske balun simu ona hosi sé-sé la interrese, simu daruak ba pakote emerjénsia. Ha’u hanoin pakote emerjénsia agora lori mai ne’e seidauk to’o, maibé Governu rasik trata hela hodi prenxe saida mak seidauk kompleta,” Marí Alkatiri hateten ba Agência Tatoli, iha Munisípiu Viqueque, sábadu ne’e.
Nia dehan, distribui pakote emerjénsia sira-ne’e ho justisa ba vítima sira-ne’ebé presiza duni apoia emerjénsia, tanba dala barak akontesementu klamidade hanesan ne’e ema balun presiza liu no balun presiza menus tanba ne’e partidu Fretilin lori apoia mai Viqueque.
“Ha’u mai vizita Viqueque, aproveita lori pakote emerjénsia hodi entrega ba komisaun jestaun risku dezastre naturál munisípiu Viqueque (KJRDNMV) no koordena ho komisaun polítika Fretilin nian hodi identifika vítima sira ho loloos, atu ema labele simu dala rua ka dala tolu,” nia hateten.
Eis Primeiru-Ministru ne’e hateten, apoia emerjénsia ne’ebé partidu Fretilin entrega ba munisípiu Viqueque mak foos totál hamutuk saka 250 no supermie totál hamutuk dos 250.
Aleinde apoia vítima klamidade foin lalais ne’e, sekretáriu jerál Fretilin Marí Alkatiri ho ninia ekipa mós fahe foos no supermie ba familia vulneravél uma kain rua iha munisípiu Viqueque hodi auguenta moris.
Tuir dadus hosi Protesaun Sivil munisípiu Viqueque, vítima afetadu dezastre naturál iha loron 29 fulan-juñu 2022 ne’e totál hamutuk uma kain 751, uma kain 555 simu ona pakote emerjénsia no uma kain 258 seidauk simu apoia emerjénsia.
Sekretariu jerál partidu Fretilin, Marí Alkateri, entrga apoiu emerj’ensia ne’e akompañadu hosi Prezidente Parlamentu Nasionál (PPN), Aniceto Longuinhos Guterres Lopes, entrega direta ba adiministradór munisípiu Viqueque, Januario Soares “Bolly”, entrega tutan ba ba komisaun jestaun dezastre naturál munisípiu Viqueque.
Notísia Relevante: Protesaun Sivil Viqueque distribui pakote emerjénsia ba suku Uma-uain Leten
Jornalista : Vitorino Lopes da Costa
Editór : Cancio Ximenes
