iklan

HEADLINE, MUNISÍPIU, VIQUEQUE

Dadús provizóriu: uma 170 iha área Beaço afetadu inundasaun

Dadús provizóriu: uma 170 iha área Beaço afetadu inundasaun

Xefe suku Maluro, Francisco Amaral. Imajen Tatoli/Vitorino Lopes da Costa

VIQUEQUE, 01 jullu 2022 (TATOLI)—Tuir dadus provizóriu ne’ebé autoridade suku rekolla hosi área Beaço, aldeia lima hosi suku Maluro no suku Uma-uain Leten, iha uma hamutuk 170 mak afetadu inundasaun ne’ebé akontese iha loron kuarta (29/06) to’o kinta (30/06) dadeer.

Suku Maluro iha uma-kain 84 mak afetadu dezastre naturál no suku Uma-uain Leten iha aldeia rua hanesan Macalico no Cailoibere ho totál afetadu 86.

“Ohin ha’u rekolla ona dadus hosi xefe aldeia lima, ne’ebé hela iha Beaço, dadús provizóriu uma-kain totál hamutuk 171 sai afetadu ba inundasaun no uma-rua maka tohar,” Xefe suku Maluro, postu administrativu Viqueque vila, Francisco Amaral, informa ba Agência Tatoli, iha postu Viqueque vila, sesta ne’e.

Notísia relevante: Uma 86 iha Beaço afetadu inundasaun

Família afetadu sira balun ba hela fali ona iha sira-nian uma no balun ba hela iha família sira-nia uma.

“Fatin evakuasaun dook, tanba ne’e família afetadu ba hela iha sira-nia família nia uma,” nia akresenta.

Maski nune’e, to’o agora família afetadu dezastre naturál seidauk hetan apoiu emerjénsia ruma.

“Ha’u rona dehan parte relevante sira mai atu fó apoiu emerjénsia ba ita-nia vítima sira, maibé dalan Usubia nian kotu, ne’ebé la hetene loos bainhira maka sira mai. Ita presiza apoiu emerjénsia ruma hodi tula vítima sira. Agora ita kontinua halo levantamentu dadus tanba uma-kain balun seidauk tama,” nia hato’o.

Iha fatin ketak, Koodenadór Cruz Vermella munisípiu Viqueque, Severina Marques da Silva, haktuir, horseik ekipa hamutuk ho Komisaun Dezastre Naturál munisípiu Viqueque atu ba suku Maluro hodi halo asesmentu ba afetadu sira.

“Ami horiseik bá duni, maibé to’o iha parte Usubia dalan kotu nune’e ami filafali. Apoiu emerjénsia ne’e ami sei ba haree no halo verifikasaun dadus afetadu sira maka ami foin apoiu emerjénsia ne’ebé sei oferese hosi Protesaun Sivil, enkuantu kona-ba dalan dalan parte obra públiku mak sei normaliza, ne’ebé ekipa sei tun ba,” nia dehan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!