DILI, 26 agostu 2022 (TATOLI)—Ministru Administrasaun Estatál (MAE), Miguel Pereira de Carvalho, sesta ne’e, hala’o sorumutu no konvidas Prezidente Repúblika (PR), José Ramos Horta, atu prezide serimónia komemorasaun loron konsulta populár ba dala-XXIII ne’ebé sei selebra iha 30 agostu.
Notísia Relevante: Governu selebra loron Konsulta Populár ho marsa saudavél-atividade desportiva
“Hato’o pedidu ida ba Prezidente Repúblika hato’o diskursu ida fó mensajen ba ita-nia nasaun kona-ba loron importante ida-ne’e no Prezidente Repúblika dehan disponível atu bele marka prezensa iha komemorasaun loron 30 agostu iha jardin 05 de Maio Colmera no serimónia ne’e sei realiza iha dadeer,” Miguel Perreira de Carvalho hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Governante ne’e informa, atividade atu komemora loron konsulta populár ho atividade sira la’o ona iha postu administrativu no suku sira liu-liu iha Dili hanesan atividade desportiva, semináriu, marsa saudavel no seluk no sei la’o mós iha loron hirak tuir mai to’o iha 30 agostu,
Iha loron 29 agostu tuku 16h00 lokra’ik sei iha misa agradesimentu iha igreja kadetrál no bainhira misa ramata sei kontinua ba iha Palásiu Governu nia oin hala’o serimónia kari aifunan iha tasi ibun.
Iha loron 30 agostu, iha ttuku 07h00 dadeer sei konsentra iha rotunda saudozu Francisco Xavier do Amaral nian hodi halo marsa saudavel ida ba to’o iha Santa Cruz tun fali ba sei ramata iha Jardim 05 de Maio.
“Nune’e. amii konvida populasaun hotu atu partisipa iha eventu ne’e,” nia apela.
Enkuantu, iha eventu komemorasaun ne’e sei iha mós konsertu múzika, dada rifa no eventu komemorativu sira seluk no Governu rasik prevee orsmentu ba komemorasaun loron konsulta populár ba tinan ne’e besik rihun $90.
Notísia Relevaante: PR Horta: “Rezultadu referendu mai hosi povu nia luta tinan 24”
Jornalista : Nelson de Sousa
Editór : Cancio Ximenes
