DILI, 25 setembru 2022 (TATOLI)–Treinadór prinsipál U-23 no seniór selesaun nasionál, Fábio Maciel da Silva, informa, Federasaun Futeból Timor–Leste (FFTL) selu ona nia saláriu fulan-haat maibé restu seidauk.
“Loos duni, FFTL selu ona ha’u-nia saláriu maibé foin fulan-haat, hahú hosi fulan-abril to’o jullu, maibé hela agostu. Ha’u nia kontratu to’o dezembru foin hotu, tanba ne’e sira tenke selu to’o dezembru,” Fábio Maciel hateten ba Agência Tatoli, via telefónika, domingu ne’e.
Nia haktuir, Prezidente no Sekretáriu Jerál FFTL seidauk kontaktu fali nia relasiona ho nia pozisaun hanesan treinadór.
“Ha’u konsege kontaktu malu ho Adjuntu Sekretáriu Jerál, Frederico Martins, maibé nia rasik labele foti desizaun. Prezidente ka Sekretáriu Jerál mak iha kompeténsia hodi ko’alia ho ha’u, atu fila ka la fila, agora ha’u sei la fila Timor bainhira laiha kontaktu,” nia akresenta.
Notísia relevante: La simu saláriu, Fabio rejigna-aan hosi Treinadór futeból selesaun nasionál
Nia dehan, bainhira FFTL la selu nia saláriu to’o nia kontratu termina, nia sei halo keixa ba Federation International Football Association (FIFA) hodi foti desizaun ruma.
Fábio rasik la mensiona montante saláriu mensál ne’ebé nia simu hosi FFTL ho razaun konfidensiál.
Kontratu FFTL ho Fábio
Treinadór Fábio nia kontratu ramata loloos iha dezembru 2021, maibé tanba nia prestasaun di’ak iha jogu AFF ne’ebé lori Timor-Leste sai terseiru lugár, mak FFTL hanaruk nia kontratu, hahú hosi 01 janeiru to’o 31 dezembru 2022.
Iha jogu AFC Cup 2021, iha fulan-outubru liubá, Timor-Leste kontra Singapura hetan rezultadu empata 2-2, kontra Koreia Súl lakon 6-0 no kontra Filipina lakon ho 1-0.
Enkuantu, iha jogu AFF Suzuki Cup 2021, iha fulan-dezembru liubá falla konkista vitória tanba iha jogu kontra Tailándia lakon 2-0, kontra Filipina lakon 4-0 no kontra Singapura nafatin lakon 2-0.
Treinadór ho nasionalidade Brazil hetan kontratu hosi FFTL hahú tinan 2015 to’o 2016, no iha tinan 2017 FFTL kontrata fali treinadór ida hosi Japaun, Norio Tsukitate, ne’ebé la fó susesu iha jogu internasionál sira.
Nune’e, iha tinan 2019, FFTL kontrata fali treinadór hosi Portugál, Fabiano Flora, maibé nafatin la susesu.
FFTL deside kontrata no fó fiar fali ba Fabio Maciel iha tinan 2020, ne’ebé konsege halo mudansa iha jogu sira.
Jornalista : Hortencio Sanchez
Editora : Julia Chatarina
