DILI, 02 setembru 2022 (TATOLI)– Sidadaun Brázil, Fabio Maciel da Silva, konfirmadu rejigna-aan ona hosi kargu Treinadór Prinsipál Selesaun Nasionál Timor-Leste Under 23 (U-23), tanba durante fulan-lima la simu saláriu hosi Federasaun Futeból Timor-Leste (FFTL).
“Durante fulan-lima, ha’u la simu saláriu hosi FFTL. Hahú janeiru to’o marsu 2022 ne’e FFTL sei selu ha’u, maibé hosi abríl to’o agostu FFTL la selu ona ha’u. Maske ha’u sei halo hela servisu lori selesaun nasionál ba joga iha liur, iha SEA Games, ba training camp iha Qatar, jogu amigavél iha Nepál no Kamboja,” dehan Fabio ba Agência TATOLI, sesta ne’e.
Ho situasaun ne’e, nia dehan durante ne’e manda email ba FFTL atu konfirma kona-ba nia saláriu, maibé FFTL sempre dehan osan besik tama ona, maibé nia rasik haree laiha osan ida tama ba nia konta bankária.
Tuir lei Federasaun Futeból Internasionál (FIFA,sigla Inglés) nian bainhira treinadór ka jogadór ida mak la simu saláriu durante fulan-rua tenke halo keixa no hapara ona hala’o atividade.
“Maibé, ha’u fó toleránsia ba sira to’o fulan lima, maibé la responde nune’e ha’u deside hapara no ha’u sei halo keixa ba FIFA, atu nune’e FFTL bele selu ha’u nia osan, ha’u hadomi Timor-Leste, ha’u kumprende Timór nia situasaun, maibé ha’u mós iha família presiza osan,” katak Fabio.
Daudaun ne’e, nia dehan halo ona konfirmasaun ho nia advogadu atu halo prosesu no tempu besik sei hato’o keixa ba FIFA atu prosesu tuir dalan legál.
“Ha’u ko’alia ona ho advogadu, tanba ha’u nia kontratu hahú janeiru to’o 31 dezembru 2022, maibé sira la selu ha’u fulan-lima, ha’u tenke para no prosesu hodi husu sira tenke selu hosi abríl to’o dezembru tanba la’os ha’u mak hakarak sai, maibé sira mak viola ha’u nia direitu,” nia relata.
Tuir informasaun ne’ebé TATOLI asesu kada fulan treinadór ne’e hetan vesimentu rihun $10.000, nune’e durante fulan-lima ona mak la selu ho totál saláriu $50.000
Nune’e, Jornalista Agência TATOLI, tenta atu konfima asuntu ne’e ba lideransa FFTL liuliu Adjuntu Sekretáriu FFTL, Frederico Martins, maibé dehan seidauk bele fó komentariu liga ba asuntu ne’e.
Kontratu FFTL ho Fabio
Loloos kontratu ba treinadór ne’e ramata iha fulan-dezembru 2021, maibé tanba nia prestasaun di’ak iha jogu AFF ne’ebé lori Timor-Leste sai terseiru lugar mak FFTL hanaruk kedan nia kontratu hosi 01janeiru to’o 31 dezembru 2022.
FFTL hanaruk kontratu ba treinadór prinsipál ne’e tanba iha jogu AFC CUP 2021, iha fulan-outubru liubá ne’e hatudu rezultadu di’ak. Tanba Timor-Leste kontra Singapura konsege empate 2-2, kontra Koreia Súl mak lakon 6-0 no kontra Filipina lakon ho 1-0.
Enkuantu, iha jogu AFF Suzuki Cup 2021, fulan-dezembru liu ba falla konkista vitória tanba iha jogu kontra Tailándia lakon 2-0, Kontra Filipina lakon 4-0 no kontra Singapura nafatin lakon 2-0.
Treinadór ho nasionalidade Brázil ne’e hamutuk ho FFTL hahú 2015 to’o 2016, maibé iha tinan 2017, FFTL kontrata fali treinadór ida hosi Japaun, Norio Tsukitate ne’ebé nafatin la fó susesu iha jogu internasionál sira.
Nune’e, iha tinan 2019, FFTL kontrata fali treinadór hosi Portugál, Fabiano Flora, maibé nafatin la susesu.
Tanba ne’e, iha 2020, FFTL deside kontrata no fó fiar fali ba Fabio Maciel, ne’ebé konsege halo mudansa tanba Timor-Leste ladun sofre ona golu barak hanesan tinan 2019 ba kotuk.
Daudaun, treinadór Fabio fó nafatin treinamentu ba selesaun nasionál U-23 hodi bele ba kompete iha jogu rejionál AFF U-23, ne’ebé sei hala’o 14 to’o 26 fevereiru 2023, hala’o iha Cambodia.
Iha jogu ne’e, Timor -Leste tama iha grupu A hamutuk ho uma-na’in Cambodia, Filipina no Sigapura.
Jornalista: Hortencio Sanchez
Editór : Florencio Miranda Ximenes