DILI, 07 outubru 2022 (TATOLI)-Tribunál Distritál Dili (TDD), liuhosi desizaun koletiva juis-nian kondena pena prizaun tinan hitu ba arguida eis Ministra Finansa (MF), Emília Pires, no arguida eis Vise Ministra Saúde (MS) Madalena Hanjan, tinan haat.
Notísia relevante: TDD re-julga kazu Emilia Pires-Madalena Hanjam
Liuhosi prosesu rejulgamentu ba kazu ne’e, Tribunál primeira instánsia kontinua mantein hodi kondena arguida na’in rua ho pena komarka tanba provadu ba krime partisipasaun ekonómika no negósiu ne’ebé previstu iha artigu 299 númeru 1 kódigu penál ba projetu fornesimentu kama ba Ospitál Nasionál Guido Valadares (HNGV, sigla portugés) liuhosi Ministéiru Saúde no absolve krime administrasaun danoza, no aplika mós selu kustu judisiária $200.
Faktu provadu momentu tinan hirak liubá arguida asume knaar hanesan membru governu hato’o pedidu ba Xefe Governu hodi ikus mai prevee iha orsamentu atu halo akizasaun sosa kama ba ospitál sira tuir nesesidade ne’ebé iha, maibé akizasaun la-tuir espesifikasaun no laiha kualidade.
Konsidera arguida Emília Pires viola dekretu lei nú.10/2005 ne’ebé altera ona ba lei nú. 1/2010 kona-ba rejime jurídika aprovizionamentu uza nia poder nu’udar Ministra Finansa hodi hetan vantajen ba nia-aan, tanba envolve nia-laen Warren Macleod, nu’udar Diretór kompañia MAC’S Metal Craft, únika kompañia iha projetu sosa kama ba MS.
Ba arguida Madalena Hanjam, nuudar ko-autora prosesu ne’e konsidera kontra lei rejime jurídiku aprovizionamentu iha prosesu halo desizaun sosa kama ba MS ho karaktéristiku single source no la liuhosi komisaun avaliasaun ba MS nian.
“Ho kumprimentu Tribunál Rekursu nian (ba prosesu rejulgamentu) mak tribunál primeira instánsia, elabora no apresia fila-fali ba depoitmentu faktu provadu, nune’e desizaun mak ida ne’e”, juis prezide, José Maria Araújo, fó sai leitura desizaun iha sala julgamentu TDD, Mandarin, sesta ne’e.
Ba arguida Emília Pires, tribunál mós aplika nafatin medida koasaun prizaun preventiva, nune’e bainhira arguida sama ain Timor-Leste mak sei halo detensaun direita.
Notísia relevante: TDD husu defeza arguida Emilia Pires arola deklarasaun sasin-sira
Nune’e ho desizaun ne’e bainhira parte defeza la aseita bele halo rekursu ho prazu loron 15, bainhira iha rekursu mak TDD sei hein desizaun prosesu ne’e to’o tránzitu em-julgadu.
“Bainhira to’o ona tránzitu em-julgadu mak arguida Madalena Hanjam sei hahú efetivu kumpre kondenasaun (pena prizaun tinan haat, hahú tama prizaun)”, juis José Maria Araújo esplika.
Sorin seluk, advogadu privadu, José Guterres, ne’ebé fó asisténsia ba arguida, hateten la konkorda ho desizaun ne’e no sei halo rekursu. “Depois parte defeza foti (dokumentu) akordaun tribunál nian mak sei halo rekursu”.
Notísia relevante: La marka prezensa iha julgamentu, MP husu Tribunál notifika arguida Emilia Pires
Enkuantu iha julgamentu ne’e Ministériu Públiku reprezenta hosi prokuradór, Rogeiro Viegas ho Lídia Soares. Prosesu ne’e, sem prejensa hosi arguida Emilia Pires.
Jornalista : Nelson de Sousa
Editora : Rita Almeida
