“Pe. Antonio Alves servi sarani nu’udar pároku Motael ba dala ikus”
DILI, 25 outubru 2022 (TATOLI)—Arsebispu Arkidioseze metropolitana Dili, Dom Virgilio Kardeál Do Carmo da Silva, SDB, hateten matebian Pe. Antonio Alves, servi nu’udar pároku Motael ba dala ikus.
Notísia Relevante: Família entrega Pe. Antonio nia mate-isin ba kreda haloot iha Maloa
“Semana rua liubá, bainhira notisia Pe.Antonio Alves nia mate to’o iha ita-nia tilun, saida loos mak ita bele halo no husi dalan saida mak ita bele agradese nia no liuhosi esforsu oin-oin atu lori nia mate-isin no horisehik to’o mai iha ita-nia leet. Ohin, ita halibur hamutuk iha fatin ne’e despedida ikus ho matebian Pe. Antonio Alves, iha fatin ne’ebé tinan 59 liubá nia simu ordenasaun saserdotál hosi Dom Jaime Gracia Goulart, iha duni fatin ne’e nia sai amu lulik iha ne’e no nia mós servi nu’udar pároku ba dala ikus,” Dom Virgilio Kardeál do Carmo da Silva, SDB, hateten liuhosi nia omilia, bainhira prezide misa requiem igreja Santu António Motael, Dili, tersa ne’e.
Ohin sarani sira halibur fali hamutuk iha fatin ne’e, hodi saran hikas nia ba Aman Lalehan nia liman, iha ne’e nia hahú nia peregrinasaun nu’udar amu lulik no iha ne’e mós nia determina nia peregrinasaun iha ordenasaun, nia mate ba mundu no ohin nia saran nia an tomak ba Maromak iha mistériu mate nian.
Tanba ne’e, ohin momentu ida atu agradese, uluk knanain agradese ba Maromak ne’ebé haraik ona ba familia, ba Arkidioseze Dili no ba kreda, Amu lulik António Alves.
“Entaun, momentu ida mós mai atu ita agradese ba nia fidelidade nu’udar amu lulik iha tinan naruk to’o semana rua liubá, bainhira Nai Maromak bolu nia,” nia dehan.
Kardeál ne’e hateten, tuir lia sasin sarani sira-nian katak Amu Antonio Alves, hanesan amu ida-ne’ebé buka duni atu sai bibi atan ne’ebé di’ak, bibi atan ida-ne’ebé servi nia bibi sira ho ksolok, hanesan ema dehan amo Antonio hirus, hamnasa nafatin no halo kómiku nafatin.
“Bibi atan ne’ebé di’ak mak hadomi nia bibi sira ida-idak. Amu ne’ebé hadomi tebes nia sarani sira nunka kolen iha dalan oioin no amu António Alves iha nia moris tomak, hakaas an duni atu hatudu buat ne’ebé nia fiar iha nia peregrinasaun moris to’o mate,” nia dehan.
Entretantu, misa requiem ne’e prezide hosi Dom Virgilio Kardeál do Carmo da Silva, SDB, akompaña hosi Bispu Dioseze Maliana, Dom Norberto do Amaral, Pároku Santo António Motael, Pe. Guilhermino da Silva inklui padr-madre no sarani sira.
Enkuantu, partisipa iha misa requiem ne’e, Prezidente Tribunál Rekursu, Deolindo Dos Santos, seminarista sira, familia Matebian, madre sira, grupu kategoriál sira, eskuteiru no Ropu Mean sira.
Tuir informasaun katak, padre António Alves mate iha Austrália iha 10 outubru 2022 no nia mate-isin lori mai Timor-Leste iha loron 24 outubru 2022. Padre nia mate-isin hatuur iha igreja Motael to’o loron rua, hahú hosi segunda no tersa, no ohin haloot ona nia mate-isin iha semitériu Maloa.
Padre António Alves, moris iha Dili, 3 juñu 1933. Oan hosi Aman Co Coelin no Inan Josefina Marques Alves.
Iha tinan 2000 simu profisaun hosi Dom Carlos Filipe Ximenes Belo, SDB, hodi hala’o kna’ar foun hanesan Pároku igreja Santo Antonio Motael, igreja ne’ebé sai fatin nia simu ordenasaun hanesan Nai Lulik iha tinan 1963 to’o momentu selebra ninia Bodas de Euro iha tinan 2013, hodi lansa primeira pedra ba parokia Motael nia atuál Altar Externo.
Jornalista : Nelia Fernandes
Editór : Cancio Ximenes
