iklan

NASIONÁL

FM husu ba komandu F-FDTL-PNTL investiga kazu kasa animál maus ho kilat

FM husu ba komandu F-FDTL-PNTL investiga kazu kasa animál maus ho kilat

Karau Timur. Foto/Google.

DILI, 04 novembru 2022 (TATOLI)—Fundasaun Mahein (FM) husu ba komandu FALINTIL-Forsa Defeza Timor-Leste (F-FDTL) no Polisía Nasionál Timor-Leste (PNTL) atu halo investigasaun ba kazu kasa komunidade nia animál maus ho kilat.

“Kazu kasa animál, ami hanoin Fundasaun Mahein nia pozisaun mak husu ba komando rua, tantu F-FDTL no PNTL atu halo took investigasaun ba kazu kasa animál komunidade ho kilat, tanba kuandu kasa animál maus hosi komunidade ho kilat Estadu, ida ne’e bele harahun konfiansa komunidade ba Institusaun seguransa Estadu nian,” Diretór Interrinu Fundasaun Mahein, Abel Amarál, hateten ba Agéncia Tatoli iha nia knaar fatin, Díli, sesta ne’e.

Tuir nia, kazu kasa komunidade nia animál ne’e la’os foin akontese maibé akontese dala rua no tolu ona, ne’ebé observasaun hosi Fundasaun Mahein mak buat ida kona-ba kaer kilat ne’e Instituisaun Estadu iha Timor ne’e rua (2) de’it, hanesan F-FDTL no PNTL.

“Hosi ne’e, tuir buat ne’ebé ita hotu hatene katak, kilat ne’e ita uja tuir nesesáriu Estadu atu defende Estadu no atu defende ba ameasa sira ne’ebé mak fó perigu ba ema-nia vida ka fó perigu ba Estadu. Maibé, ita haree fila-fali akontesimentu sira hanesan kasa animál ne’e, ami hanoin ida ne’e fora ona hosi regra ne’ebé iha, tanba tuir lolos ita-nia Instituisaun seguransa, liu-liu seguransa interna atu proteje sidadaun la’ós sidadaun ema de’it, maibé ho sasan sira mós,” nia dhan.

Aleinde ne’e, kuandu ita haree akontesimentu kasa animál maus hosi komunidade ne’e kontra ona regra utilizasaun kilat nian, tanba kilat ne’e Estadu no povu nian entaun tuir lolos sira tenke utiliza kilat ne’e ho responsabilidade.

Nia esplika, Fundasaun Mahein nia monitorizasaun ba kazu kasa animál ne’ebé akontese ona dala rua no dala tolu ne’e iha tinan liubá ne’ebé akontese iha parte Bobonaro, Loes no iha Alas mós akontese iha Same, ida-ne’e hanoin komandu hatene.

“Foin lalais akontese iha Natarbora parte Same nian. Tanba ne’e, Fundasaun Mahein husu ba komandu PNTL no F-FDTL halo took investigasaun ruma sé loos mak envolve iha kazu ida-ne’e, hosi ne’e kuandu indentifika membru ruma mak utiliza kilat Estadu hodi kasa fali animál fuik tenke fó sansaun todan. Tanba kilat ne’e la’ós hodi halimar no la’ós atu kasa fali animál maus komunidade nian, tanba kilat ne’e kilat Estadu, entaun ita uza tuir nesesáriu no uza tuir nesesidade Estadu nian,” nia dehan.

Hosi kazu kasa animál ne’ebé pakontese ona iha Natarbora, Alas no Bobonaro parte Loes, Fundasaun Mahein husu komandu atu investiga maibé sira (PNTL no F-FDTL) seidauk fó sai rezultadu investigasaun.

“Entaun, ho akontesimentu foin lalais ne’e, ita husu ba komandu atu halo investigasaun ba kazu kasa animál maus komunidade nian, atu nune’e komunidade bele hatene katak, uza kilat Estadu hodi kasa animál komunidade ne’e Estadu la autoriza, hosi ne’e tenke fó sansaun atu nune’e membru sira seluk labele halo tuir buat ne’ebé sira seluk halo,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!