DILI, 18 novembru 2022 (TATOLI)—Sosiedade Sivil liuhosi Forum Organizasaun Naun Govermentál Timor-Leste (FONGTIL), enkoraja Governu atu hahú investe Orsamentu Jerál Estadu (OJE) 2023 biliaun $3,16 ne’ebé Parlamentu Nasionál aprova ne’e iha setór produtivu, nune’e bele hadi’a povu nia moris.
Notísia Relevante: PN aprova proposta-lei OJE 2023 biliaun $3,16 iha finál globál
“Antes PN atu aprova OJE 2023, ami propoin no husu ita-nia Governu no Parlamentu atu halo konkordánsia ida katak tempu ona para ita investe ba setór sira ne’ebé ita konsidera produtivu. Maibé, saida mak ami haree, tinan ida-ne’e se setór sira tau hamutuk ita prenxe de’it 17%. Tanba, ita-nia edukasaun nia orsamentu sei la to’o 10%, agrikultura iha 5 ka 6%, nune’e ha’u hanoin ami enkoraja makaas katak investe ba setór ne’ebé ita konsidera produtivu,” Diretór Ezekutivu Forum Organizasaun Naun Govermentál Timor-Leste (FONGTIL), Valentim da Costa Pinto, hateten liuhosi konferénsia imprensa ne’ebé halo iha Salaun FONGTIL, Caicoli, sesta ne’e.
Tuir nia, iha Orsamentu Jerál Estadu 2023 ne’e FONGTIL enkoraja teb-tebes ba Governu tenke tau osan atu nune’e natón ba Governu hodi eleva situasaun iha Timor-Leste.
“Ami enkoraja teb-tebes ba sira, Governu tenke tau osan ona, porsaun orsamentu ne’e natón ba sira para ita eleva ita-nia situasaun sira-ne’ebé ita konsidera, hanesan problema ba ita-nia rain,” nia esplika.
Iha OJE 2023 ne’e, FONGTIL ho nia membru nafatin tau matan no monitoriza lala’ok sira-ne’e, atu hanoin Governu iha duni seriedade hosi investe osan no kontinua ezekuta osan ne’ebé sira aprova, atu bele fó mudansa ba situasaun sira-ne’ebé konsidera dezafiu ba Timor-Leste.
Notísia Relevante: Komisaun C finaliza redasaun finál proposta-lei OJE 2023
Jornalista : Nelia Fernandes
Editór : Cancio Ximenes
