DILI, 12 dezembru 2022 (TATOLI)—Institutu Nasionál Seguransa Sosiál (INSS) rejista ona ema besik 100.000 mak sai hanesan kontribuinte ba seguransa sosiál.
Prezidente Konsellu Administrasaun INSS, Longuinhos Armando Leite, informa kontribuente ba seguransa sosiál ne’e rejistu hahú hosi tinan 2016 to’o 2022.
“Benefisiáriu besik 100.000 hamutuk 54.000 mai hosi Polísia Nasionál Timor-Leste (PNTL), Forsa Defeza Timor-Leste (F-FDTL) no sira seluk tán,” nia hateten ba Agência Tatoli, iha Caicoli, Dili, segunda ne’e.
Tuir nia, Institutu Nasionál Seguransa Sosiál (INSS) ne’e fó númeru identidade seguransa sosiál ba kada ema.
Kona-ba direitu pensaun nian tanba kaben-na’in ida mate, Prezidente fó-hatene katak bainhira sira ida mate, ida seluk sei simu maibé ba tinan ida de’it sei liuhosi tempu ne’ebá ba direitu ne’e ba bei-oan sira.
Prezidente INSS ne’e hateten kona-ba direitu ba ema ida-ne’ebé reformadu, hanesan ezemplu mak profesór ida-ne’ebé reformadu ho vensimentu kada fulan $300 mak nia reformadu, INSS ne’e sei selu sorin balun kada fulan.
INSS ne’ebé daudaun ne’e iha rezerva ida ho valór orsamentu millaun $156 iha kaixa rejime kontributivu seguransa sosiál nian iha Timor-Leste ne’ebé hetan ona aprovasaun iha tinan 2016.
Maibé Dekretu-Lei sira-ne’ebé regula obrigasaun pagamentu no benefísiu sira aprova ona iha loron 24 fulan-maiu tinan 2017.
Rejime kontributivu úniku no universál ne’ebé hala’o operasaun ba seguransa sosiál inklui mós apoiu ho subsídiu sira, ba maternidade no mate, entre sira seluk.
Jornalista : Osoria Marques
Editór : Cancio Ximenes
