DILI, 10 janeiru 2023 (TATOLI)—Deputadu hosi bankada Congresso Nacional da Reconstrução Timorense (CNRT) iha Parlamentu Nasionál (PN), Maria Barreto, husu Governu normaliza estrada ne’ebé ameasa kotu iha área Galisapulu iha suku Lahomea, postu administrativu Maliana, munisípiu Bobonaro.
Notísia Relevante: Bobonaro : Mau-Leto husu IGEADI normaliza estrada Galisapulu ne´ebé ameasa kotu
“Udan ne’ebé mak ho volume makaas, rezulta estrada hosi Maliana-Bobonaro, ba postu Bobonaro no postu Lolotoe estrada kotu. Estrada kotu ne’e iha fatin suku Lahomea-Galisapulu, depois mós iha dalan atu ba Oeleu ba iha postu Lolotoe ho Bobonaro ne’e mós dalan kotu. Ho ida-ne’e husu ba Ministéiru Obras Públiku (MOP) liuhosi Institutu Jestaun Ekipamentu (IGE) oinsá normaliza lalais, nune’e fasilita movimentu transporte públiku bainhira lao ba mai,” Deputadu CNRT ne’e hato’o liuhosi reuniaun plenária PN, tersa ne’e.
Deputada ne’e levanta mós preokupasaun seluk komunidade postu Bobonaro, suku Molo tanba daudaun ne’e la asesu liña internet Timor Telekom tanba iha problema ho liña, tnaba ne’e husu Ministériu Transporte no Komunikasaun (MTK) atu toma atensaun.
Deputadu hosi bankada FRETILIN, Ilídio Paicheco, hato’o kondisaun estrada ligasaun Aileu hosi Seloi-Ermera presiza hadi’a.
“Preokupasaun estrada ne’e, hau foti bebeik, parese hosi orsamentu 2021 nian to’o agora seidauk halo ne’e tanbasá. Estrada iha Aileu ba Ermera ba Lekidoe no Seloi niana ne’e aat loos ona. Semana ida liu bá, ha’u liu hosi ne’eba, ita haree iha ne’ebá movimentu hosi Gleno-Ermera no hosi Aileu ba-mai tanba merkadu ida iha Seloi maibé dalan mak ladi’ak ona,” nia dehan.
Hatán ba preokupasaun ne’e, Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Jerónimo, rejista hela no sei enkamiña ba minustru tutela hodi tau atensaun.
Notísia Relevante: AMB sei esforsa normaliza estrada Galisapulu
Jornalista : Nelson de Sousa
Editór : Cancio Ximenes
