BOBONARO, 29 dezembru 2022 (TATOLI) – Xefe Suku Lahomea, Postu Administrativu Maliana, Munisípiu Bobonaro, Cirilio Mau-Leto, husu ba Ministériu Obras Públika atu orienta Institutu Jestaun Ekipamentu Apoiu Dezembolvimentu Infrastrutura, Institutu Públiku (IGEADI,I.P) atu halo normalizasaun ba estrada iha área Galisapulu ne’ebé ameasa atu kotu hafoin akontese udan bo’ot fulan kotuk ne’e.
Notísia relevante:Governu presiza halo intervensaun urjénsia ba estrada Galisapulu iha Bobonaro
“Ha´u lahatene sira nia planu ne’e to’o ne’ebé ona, agora dalan ida iha Galisapulu ne’e grave los ona mais seidauk iha intervensaun, ne’ebé ha’u hanesan lideransa komunitária husu ba Ministériu Obras Públika haruka IGE mai dudu lalais rai sira ne’e atu bele fasilita komunidade sira asesu ba mai ho di’ak”, Nia informa ba jornalista sira iha Maliana, kinta ne’e.
Tuir nia maske movimentasaun transporte públiku kontinua la’o maibé Governu presiza halo intervensaun emerjénsia tamba durante ne’e kondisaun udan la para, nune’e rai kontinua halai hala’o hodi rezultadu aliserse rai iha parte kraik hahú kontinua tun ba okos.
“Governu presiza haree duni tamba dalan ne’e la’ós ba de’it komunidade postu administrativu Loloto’e no Bobonaro maibé sira hosi Ermera hanesan Atsabe mós liu, inklui komunidade sira hosi Covalima mós la’o ba mai iha estrada ne’e”, Xefe suku Cirilio rekorde.
Aleinde ne’e, Mau-Leto mós husu ba Governu atu tau atensaun ba estrada Urbana kapitál Maliana ne’ebé dezde ukun-an kedas seidauk rezolve.
“Estrada ne’e iha tempu udan ita haree hanesan mota fali, bee mak sulin tuir dalan, ha’u hanesan xefe suku dezde portugués nia tempu kedas sente triste haree kondisaun estrada iha kapitál Maliana ne’e, boot sira mak troka ba mai maibé estrada mak nafatin at bebeik hanesan agora”, preokupa
Nia dehan Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06.
Enkuantu estrada urbana Maliana pakote II, estrada prinsipál ho estimasaun valór globál $23,587.019,36.
Notísia relevante:IGE mobliza ona ekipamentu halo normalizasaun mota iha Cailaco
Jornalista: Sérgio da Cruz
Editór: Zezito Silva
