iklan

EKONOMIA, BOBONARO, HEADLINE, MUNISÍPIU

IGE mobliza ona ekipamentu  halo normalizasaun mota  iha Cailaco

IGE mobliza ona ekipamentu  halo normalizasaun mota  iha Cailaco

Operadór buldozer halo hela normalizasaun mota iha postu administrativu Cailaco, munisípiu Bobonaro. Imajen espesiál.

BOBONARO, 21 novembru 2022 (TATOLI) – Institutu Jestaun Ekipamentu, Institutu Públiku (IGE. I.P, sigla portugés), segunda ne’e hahú mobliza ekipamentu pezadu atu halo normalizasaun mota Cla-Ola no Sera-Si ne’ebé lokaliza iha suku Purugua no mota Rai-Luli lokaliza iha suku Atudara, postu administrativu Cailaco, munisípiu Bobonaro.

IGE halo intervensaaun ne’e tanba iha loron-sesta, 18 novembru to’o sábadu, 19 novembru 2022 akontese udan boot rezulta korrente bee hosi mota tolu ne’e sobu estraga komunidade suku Purugua  uma-kain ida no suku Atudara uma-kain 12 mak afetadu hosi inundasaun.

“Horisehik dadeer ha’u foin simu telefone hosi administradór, liga kedas ba Prezidente Autoridade, maibé horisehik atu mai, maibé ami-nia prezidente foin haruka mina mai, agora iha dalan ona, orsida lokraik ami bele halo normalizasaun mota,” nia informa ba jornalista sira iha Cailaco, segunda ne’e.

Nia dehan, ekipamentu ne’ebé sei halo operasaun serbisu mak hanesan buldozer ida, eksavatór ida no lowder ida.

“Ami simu orientasaun halo normalizasaun de’it ba mota, ami halo normalizasaun haree ba serbisu, iha terrenu tiha mak ami foin bele hatene loron hira, maibé ami sei atende hotu,” nia akresenta.

Prezidente Autoridade Munisípiu Bobonaro, Ernesto de Oliveira Barreto, agradese ba IGE tanba bele responde ona pedidu normalizasaun.

“IGE nia prezensa iha ita-nia leet hodi hala’o serbisu, ne’ebé garante ohin, aban no bainrua sira sei haree fali atu nune’e bee ne’e labele mai tán,” nia katak.

Nia apela ba komunidade afetadu sira bainhira akontese udan-boot iha tempu kalan atu evakua ba família sira, nune’e labele akontese situasaun ne’ebé grave liu.

IGE hein pedidu normaliza estrada Galisapulu

Xefe Ekipa IGE. I.P Maliana, Costodio Perreira, sei hein  autoridade postu administrativu sira atu hato’o pedidu ba nasionál hodi halo normalizasaun ba estrada iha área Galisapulu, suku Lahomea, postu administrativu Maliana, munisípiu Bobonaro ne’ebé ameasa atu kotu hafoin udan-boot iha semana rua ba kotuk.

Nia dehan, kulakér normalizasaun tenke aprezenta ba Ministru Obras Públika, Abel Pires, nune’e hatún despaxu ba Prezidente Konselu Administrasaun IGE,I.P hodi orienta ekipa sira dezloka ba terrenu.

Notísia relevante: Governu presiza halo intervensaun urjénsia ba estrada Galisapulu iha Bobonaro

“Ne’e só administradór postu mak bele halo pedidu ba nível nasionál mak hatún mai dehan loos ona, ida-ne’ebá atu kotu ona imi tenke ser atende lalais,n inia lala’ok mak hanesan ne’e,” nia fó hanoin.

Nia haktuir, iha tinan kotuk 2021 sira konsege halo Normalizasaun Estrada refere no halo meloramentu estrada ba to’o suku Aia-Asa,kobre aldeia Odelgomo no Mazop.

Responsável IGE ne’e haklaken dadaun ne’e sira seidauk hetan orientasaun hosi nasionál atu bele halo intervensaun ba estrada parte Galisapulu.

“Ami iha terrenu ne’e hein de’it, ami-nia boot sira iha nasionál haruka ami ba, entaun ami tenke ba, bazea ba proposta ne’ebé sira hatama atu ami lori ekipamentu ba ona terrenu,” nia hateten.

Prezidente Autoridade Munisípiu Bobonaro, Ernesto de Oliveira Barreto, hateten, estrada ne’e governu tau ona prioridade tinan ne’e.

“Ita hein de’it, tanba foin lalais fó-sai ne’e, só ida Nunura no Maliana laran 22 kilómetru la sala. Ida-ne’e mak sei fó-sai maibé ita-nia proposta estrada Maliana ba Bobonaro no Lolotoe iha ona nasionál, hein atu hala’o konkursu públiku,” nia haktuir.

Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06.

Enkuantu estrada urbana Maliana pakote II, estrada prinsipál ho estimasaun valór globál $23,587.019,36.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!