DILI, 20 janeiru 2023 (TATOLI)— Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE,I.P), iha tinan 2022 konsege halo poupansa ba orsamentu estadu milliaun $4 ba kofre Estadu.
Prezidente Konsellu IGEADE,I.P, Hermenegilda da Costa Laurentina, dehan liafuan ne’e ba Agência TATOLI, iha Palásiu Governu, Dili, sesta ne’e.
“Karik ita fó ba empreza privada sira, ita tenke hasai millaun $4 atubele loke konkursu ba sira atu bele serbisu. Maibé ita-nia Primeiru-Ministru lakohi tanba tenke aproveita ita-nia rekursu ne’ebé iha. Bainhira labele mak foin loke konkursu entaun durante ne’e IGEADE, I.P halo ona nia serbisu tun diretamente hodi rezolve infraestrutura públika, no konsege halo poupansa ba orsamentu refere,” Prezidente IGEADE, I.P, Hermenegilda dehan.
Nia isplika, orsamentu tinan 2022 ba institutu ne’e hamutuk $4.113.844.00, ne’ebé hosi orsamentu IGEADE hodi hala’o nia servisu tuir planu ne’ebé iha.
“Ba tinan ne’e reseita ne’ebé ami hetan liuhosi fó aluga mákina pezadu ba empreza sira no fa’an brites hamutuk $110.680,79. Ne’ebé reseita sira ba hotu kofre Estadu,” nia akresenta.
Nia dehan, poupansa hosi milliaun $4 ne’e maihosi IGEADE,I.P ne’ebé halo servisu direitamente hanesan melloramentu estrada, loke estrada foun, normaliza mota hodi apoiu interministeriál nomós maihosi apoiu urjénsia sira ne’ebé atividade la’o ona.
“Maibé ha’u atu dehan katak poupansa orsamentu 2022 ne’e de’it mak milliaun $4 maibé ita konta VIII Governu nia ukun hahú hosi 2018 to’o mai agora ita konsege halo poupansa ba orsamentu Estadu ne’e hamutuk milliaun $25,” nia dehan.
Jornalista : Arminda Fonseca
Editora : Armandina Moniz
