OÉ-CUSSE, 03 fevereiru 2023 (TATOLI) – Xefe Departamentu Eletrisidade Timor-Leste (EDTL) Oé-Cusse, Armindo Maria Mendonça, informa, daudaun ne’e EDTL forma ona ekipa hodi kontrola konsumidór sira iha territóriu Rejiaun Administrativa Espesiál Oé-Cusse Ambeno (RAEOA) kona-bá utilizasaun liña eletrika ilegál.
“Iha konsumidór balu dada ilegál, maibé ami toman rezolve no fó sansaun la’ós kmaan, maibé ami sei fó sansaun ida ke todan tuir regulamentu ne’ebé hasai ona iha Jornál Repúblika atu implementa ba sidadaun hotu,” Armindo Maria Mendonça, ko’alia iha Oé-Cusse, sesta ne’e.
Tuir nia, durante téknika EDTL kontinua halo kontrolu iha terrenu, tama uma sai uma, tanba agora sidadaun hotu iha ona koñesimentu kona-bá utilizasaun eletrisidade, tanba liuhosi formasaun iha sentru formasaun sira iha Timor-Leste.
“Maibé ami forma ona ekipa atu kontrola kuandu hetan primeiru fó sansaun kmaan karik foin mak prátika hodi dezliga tesi kotu liña, no husu submete halo ligasaun foun, depois ida-ne’e parte EDTL sei fó hatene kedas, ami hala’o bazea regulamentu Estadu nian, karik akontese tán sei hetan sansaun todan, multa sei maka’as mak foin bele hetan fali ahi,” nia fó hanoin.
Nune’e nia apela ba konsumidór iha territóriu Oé-Cusse, atu kontribui tanba ne’e Estadu nian.
Xefe Departamentu ne’e esplika, maneira atu selu multa ne’e iha regulamentu hatete ona, sei konsumidór uza ahi ne’e iha sá fulan.
“Maneira atu sura ne’e hahú hosi nesesidade nian, gasta hira karik uza ba jelera, bomba bee-moos nian, eletrónika, televizaun buat hotu-hotu ne’ebé uza ahi durante ne’e sei sura hotu tama iha sansaun selu multa, sura hahú hahú hosi uza ne’e to’o fulan ikus ami kaer kona ita ne’e,” nia esplika.
Nia hatutan, situasaun ne’e akontese dala rua ona, akontese iha loza tolu iha Oé-Cusse ho modelu hanesan ne’e, sura hotu, tanba ne’e Estadu nia fasilidade sidadaun hotu tenke kumpre ba regulamentu.
“Ba uma privada seidauk toman, maibé ita apela nafatin, agora ami fó ona aviza iha bairru no aldeia suku, katak akontese sei hasoru regulamentu hodi submete selu-multa,” nia katak.
Jornalista: Abílio Elo Nini
Editór: Evaristo Soares Martins
