DILI, 09 fevereiru 2023 (TATOLI) – Koordenadór Programa Nutrisaun Sentru Saúde Vera Cruz Antonio da Cruz, hateten suplementu Super Sereál iha Sentru Saúde Vera Cruz sufisiente ba inan sira fó susun no inan isin rua.
“Sentru Saúde Vera Cruz iha programa suplementu hahan ne’ebé sufisiente ba distribuisaun ba inan isin rua no inan sira ne’ebé mak fó susun”, Antonio da Cruz, dehan ba jornalista sira iha nia fatin Sentru Saúde Internamentu Vera Cruz, ohin.
Ai-han ne’ebé mak distribui ba inan isin rua ho inan fó susun ba labarik ne’e bolu ai-han super sereál, fahe ba kada benifisiáriu ida tenke hetan 6 kg, ida ne’e ba fulan ida tomak ne’ebé ninia kriteria utilizasaun atu tein ne’e inan ida tenke konsumu 200 gram.
“Iha 200 gram ne’e ita sukat ba kanuru isin 10 bee kopu tolu, depois produtu lokál ne’ebé mak ita iha tenke tein uluk tiha, depois mak tau ai-han super sereál ka batar uut ne’e kanuru isin10 tau ba sana ne’ebé mak prepara ona, depois too menutu lima to’o menutu sanulu bele hasai para inan sira bele konsumu loroloron durante fulan tomak ida”, nia esplika.
Nia hatutan, inan sira ne’ebé mak simu ona ai-han super sereál ne’e hamutuk 200 resin ona, ne’ebé tuir relatóriu ne’ebé iha, agora kona-ba suplementu sei sufisiente hela ba to’o iha fulan oin.
“Ami iha ne’e estoke sufisiente atu halo distribuisaun ba benefisiáriu sira, liuliu ba inan sira ne’ebé mak fó susu ba bebé to’o tinan ida, ida ne’e prioridade, no mós inan isin rua sira ho objetivu atu ajuda sira, ai-han família nia la kompletu entaun ho programa ai-han super sereál ne’e ajuda ai-han família nian atu bele ajuda iha parte nutrisaun atu bebé moris mai ho kondisaun normál no labele monu ba má nutrisaun ida ne’e mak importante”, nia informa.
Iha fatin hanesan, responsável programa nutrisaun iha Sentru Saúde Formoza, Ercio de Jesus Doutel Sarmento, afirma inan isin rua sira no inan sira fó susun ba labarik ne’ebé mak hetan má nutrisaun hamutuk 19 maibé inan sira ho normál totál 92.
“Ami halo tratamentu ba sira no sira simu hela suplementu super sereál iha fulan janeiru nian, kategoria ba inan ne’e jerál de’it, sira nia todan mak 23 tun mai kraik entaun konsidera ne’e tama ona ba má nutrisaun, inan sira isin rua ho inan fó susu ninia tratamentu mak ho suplementu super sereál ida ne’e”, Ercio hateten.
Nia informa, suplementu super sereál ba inan sira ne’e iha 333 kaixa, ne’ebé distribui ona balun ba iha inan sira, ne’ebé agora hela de’it 250 kaixa no inan sira ne’ebé mak asesu ona ba suplementu super sereál ne’e hamutuk 92.
Jornalista : Felicidade Ximenes
Editór : Zezito Silva
