DILI, 09 fevereiru 2023 (TATOLI)–Uniaun Europeia (UE) hamutuk Plan International Timor-Leste (PITL), kinta ne’e, lansa projetu foun kona-ba promove eleisaun inkluziva demokrátiku iha Timor-Leste.
Notísia Relevante: Semana oin PR dekreta loron eleisaun parlamentár
Projetu ne’e sei akompaña hosi Sosiedade Sívil sira hanesan Asosiasaun Defisiénsia Timor-Leste (ADTL), ONG BELUN, JPIC, MOFFE, Pátria no Caucus hodi implementa no promove partisipasaun inkluzivu hosi feto, joven no ema ho defisiensia iha prosesu eleisaun.
Projetu ne’e sei finansia hosi Uniaun Europeia ho nia durasaun tinan rua no sei implementa iha munisipiu 13 inklui Rejiaun Administrativa Espesiál Oé-Cusse Ambeno (RAEO).
Nia dehan, bainhira implementa projetu ne’e sei servisu hamutuk ho Komisaun Nasionál Eleisaun (CNE) no Sekretáriadu Tékniku Administrasaun Eleitorál (STAE), estasaun rádiu komunidade sira, feto, partikularmente polítiku sira iha Parlamentu Nasionál, joven no ema ho defisiénsia (EhD).
“Ida-ne’e mellora prosesu demokrátiku no promove partisipasaun inkluziva hosi eleitór iha eleisaun. OSS local sei servisu hodi garante inkluzaun no partisipasaun grupu ne’ebé marzinalizadu liu iha prosesu eleitoral,” Ambaixadór Uniaun Eurepia (UE) ba Timor-Leste, Marc Fiedrich, hateten ba jornalista sira, iha Delta Nova, kinta ne’e.
Objetivu atu responde ba dezafiu sira-ne’ebé identifika ona iha eleisaun anteriór no apoia asaun hodi implementa rekomendasaun sira hosi relatóriu Observasaun Misaun Eleitoral UE iha tinan 2022, ne’ebé haree liu ba importánsia hosi joven sira-nia envolvimentu iha prosesu demokratiku.
Asaun ne’ebé foka liu ba nesesidade no limitasaun sira-ne’ebé sosiedade sivil timoroan enfrenta hodi konsolida demokrásia no eleisaun sira iha Timor-Leste.
Projetu ne’e sei oferese formasaun, mentoria no aprendizajen ne’ebé mútua, hodi nune’e kria kondisaun di’ak ba partisipasaun iha prosesu eleitorál no kontribui ba dezenvolve politika ne’ebé efikasia.
“Uniaun Europeia kompromete hodi apoia demokrasia no direitu umanu iha Timor-Leste. Ami kapasita asaun hosi sosiedade sivil hodi reforsa esforsu Governu no povu Timor-Leste hodi harii demokrasia ida-ne’ebé forte no sustentável. Mai ita hako’ak ita-nia dever síviku, hato’o kestaun sira ho di’ak no serbisu hamutuk hodi kria futuru ne’ebé nabilan liuhosi poder eleisaun ne’ebé livre no justu,” nia dehan.
Jornalista : Osória Marques
Editór : Cancio Ximenes
