OÉ-CUSSE 24 fevereiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) lidera hosi Arsénio Paixào Bano, informa, iha tinan 2023 sei konstrui projetu fíziku 91 foka liu ba investimentu públiku kada setór.
“Iha tinan ne’e iha investimentu públiku sei maka’as liután ho orsamentu millaun $120, orsamentu ne’e iha 91 projetu fíziku, ne’e iha kapitál dezenvolvimentu la konta ho pangadaan manutensaun ho reabilitasaun, ita-bele konta besik 200 projetu atu halo iha tinan ida-ne’e,” Arsénio Paixão ko’alia iha ámbitu konferénsia CCI-TL Oé-Cusse iha otél Oé-Upun, kinta ne’e.
Autoridade RAEOA daudaun ne’e realiza ona diskusaun ho membru autoridade sira atu halo ajustamentu balu ba projetu fíziku sira-ne’e.
“Tinan ida-ne’e mós ita sei halo uma ba komunidade sira-ne’ebé hetan afeta hosi projetu sira ita sei 200, ita troka ho uma foun, dezeñu ami hein hela atu aprova tanba prepara hosi Sekretáriu Rejionál ba Asuntu Terra Propriedade, depois iha obra seluk presiza parsériu atu apoiu,” nia katak.
Ezekutivu ne’e informa, projetu fíziku 91 ne’e mai hosi setór hotu-hotu, reforsa edukasaun harii eskola hodi hakbesik ba aldeia no suku, fasilidade saúde importante ba komunidade, liuliu dook hosi atendimentu saúde.
Agrikultura, persiza konserva fatin protejida sira ba rikusoin naturál ninian ho projetu seluk, hanesan embun, no infraestrutura bazika seluk estrada rurál sira.
“Tanba Oé-Cusse iha kompetisaun maka’as ho nasaun viziñu liuliu NTT, nia dezenvolvimentu la’o haleu ona fronteira sira, nune’e Oé-Cusse tenke servisu maka’as,” nia tenik.
Nia klarifika, projetu barak durante ne’e akontese la’ós interese ho partidu polítiku maibé regra aprovizionamentu ba regula bazea ba lei no dekretu lei sira.
“Durante ne’e ha’u la’o iha rai-li’ur, ha’u rona dehan projetu sira-ne’e aplika ba kór partidu, maibé hakarak klarifika katak, osan ne’e povu nian osan Estadu, Governu Sentrál aloka mai ba povu Oé-Cusse, entaun projetu ne’e ba ema hotu, prosesu tenderizasaun (konkursu públiku) hotu-hotu iha regulamentu nia okos, lei maka manda ne’ebé ita la’o tuir baze legál ruma, tanba iha mós reklamasaun durante loron lima karik la konkorda ho rezultadu ruma,” nia klarifika iha otél Oé-Upun.
Tuir nia, iha 2022 RAEOA hetan millaun $84, maibé iha ezekusaun atinje de’it pursentu 50, tanba iha iha esperiénsia empreza balu akumula projetu tolu to’o haat, entaun tendénsia prestasaun servisu tún, la kumpri termu kontratu terminadu.
“Tán ne’e ha’u enkoraja ita hotu, katak investimentu públika iha RAEOA ne’e iha, emprezáriu sira bele ajuda Autoridade RAEOA, hanesan prezidente ha’u-nia interese servisu tenke la’o di’ak no ptojetu tenke halo garante kualidade, projetu fíziku ne’e tenke iha tuir kontratu, ne’e atu ita avansa tán ho inisiativa seluk,” nia fó hanoin.
Notísia relevante: OJE 2023: RAEOA define programa 16 korresponde ho millaun $120
Jornalista: Abílio Elo Nini
Editór: Evaristo Soares Martins
