ERMERA, 28 abril 2023 (TATOLI) – Komandu Polísia Nasionál Timor-Leste Munisípiu Ermera husu ba komunidade iha Postu administrativu Hatulia B atu manten hakmatek no kontribui ba hametin pás durante kampaña eleitorál ba Eleisaun Parlamentár 21 maiu 2023.
Komandante PNTL Ermera, Justino Menezes husu ba komunidade Hatulia B atu kumpri regra bainhira partisipa iha kampaña polítika sira.
“Imi tenke kumpri regra sira ne’ebé mak CNE, STAE no Komandu PNTL fó sai ona. Tenke respeita ida-idak nia partidu. Partidu ki’ik respeita partidu bo’ot sira no partidu bo’ot sira mós presiza respeita partidu ki’ik sira,” Komandante Justino hato’o lia hirak ne’e iha ninia intervensaun durante dialógu komunitária entre MAPKOMS no Komunidade Postu administrativu Hatulia B, iha suku Licapat, sesta ne’e.
Komandante ne’e dehan, komunidade sira tenke kontribui maka’as atu insidente ki’ik oan sira entre militante no simpatizante partidu polítiku labele akontese iha munisípiu Ermera.
Atu mantém pás no establidade iha munisípiu Ermera durante kampaña eleitorál, iha 17 abril 2023, partidu polítiku, lia-na’in, no líder komunitária sira asina Paktu Eleisaun Pasifíku iha Glenu hodi foti liafuan ida katak “Hun Ida, Mahon Ida no Roman Ida Ba Ermera Ida De’it.”
“Antes imi hanoin atu halo asaun krime ruma, tenke hanoin liafuan ida ne’e – Hun Ida, Mahon Ida no Roman Ida Ba Ermera Ida De’it,” nia apela.
Komandante Justino subliña katak odi malu partikulár labele lori tama iha kampaña eleitorál hodi estraga malu.
“Maske partidu ketak-ketak maibé ita halo ba rai ida de’it, no atu halo di’ak ba rai ida ne’e. Ne’ebé buat ida diskriminasaun ka la gosta malu labele aplika fali iha polítika nia laran,” Komandante ne’e esplika.
Nia apela ba líder polítiku sira katak, maske kor oi-oin maibé objetivu ida de’it, atu dezenvolve nasaun Timor-Leste.
“Partidu politika sira labele arogansia liu maibé unidu nafatin ho tema ida ne’ebé mak ita foti iha asina Paktu Eleisaun Pasífika,” Komandante Justino konklui.
Journalist: Filomeno Martins
Editora: Nelia Borges
