DILI, 05 maiu 2023 (TATOLI)—Partidu Asosiasaun Sosiál Demokrátika Timorense (ASDT) ne’ebé Tribunál Rekursu la valida hodi la partisipa iha eleisaun 2017 no eleisaun parlamentár 2023 ne’e, iha inisiativa atu reforsa no sei fó votu ba partidu Fretilin iha eleisaun lejislativa tinan ida-ne’e.
Sekretáriu Jerál partidu Asosiasaun Sosiál Demokrátika Timorense (ASDT), Norberto Pinto ho Sekretáriu Jerál partidu FRETILIN, Mari Alkatiri, sesta ne’e, asina karta entendimentu hodi apoiu FRETILIN iha eleisaun parlamentár 2023, iha Komite Sentrál Fretilin (CCF, siglá portugés), Comoro, Dili.
“FRETILIN mai hosi ASDT, tanba ne’e ohin la’ós ida-idak fila ba nia uma maibé rua hamutuk iha nia uma laran ne’e mak foin akontese. Aami asina karta entendimentu ida atu hahú serbisu hamutuk iha tempu kampaña no ba loron eleisaun 21 maiu, ita ba vota,” Sekretáriu Jerál Partidu FRETILIN, Mari Alkatiri, hateten ba jornalista sira liuhosi konferénsia imprensa.
Tambá ne’e, Alkatiri konsidera momentu ida importante tebes atu ema hotu fila hikas ba nia uma lisan nasionál atu hosi ne’e ba oin, fó hanoin nafatin ba kotuk hodi hateke ba oin.
Signifika, nia dehan, hamutuk ita tenke ukun atu Fretilin nia prinsípiu no valór sira-ne’e implementa fila-fali iha vida tomak Timor-Leste nian.
Alkatiri hateten, akordu ne’e atu la’o hamutuk entre partidu rua iha eleisaun agora no kontinua ba futuru mai.
Sekretáriu Jerál Partidu ASDT, Norberto Pinto, hateten nia parte reprezenta estrutura tomak hosi nível nasionál to’o aldeia, ohin iha ne’e hahu kria fali istória foun ida-ne’ebé la’ós atu foun maibé hahú kedas iha tinan 1974 to’o mai ohin loron.
“Ita hotu hamutuk iha ne’e la signifika ita hamutuk iha fatin ka partidu foun ruma. ASDT no FRETILIN, ema ida de’it hanesan aman ho oan. Iha kompromisu nota entendimentu laran, nune’e hahú ba ohin hodi tau konfiansa ba malu nafatin atu lori prosesu ba oin liu-liu ASDT ba FRETILIN,” nia hateten.
Nia hateten, razaun ASDT apoiu FRETILIN tanba mai hosi istória ne’ebé hakerek nanis ona la’ós foin moris, maibé hahú kedas hosi tinan 1974 no sei kontinua la’o hamutuk ba oin.
Nia garante, lalika dúvida tanba ASDT nia estrutura metin iha munsípiu 14 kompletu no prontu hamutuk ho FRETILIN hodi fó vitória iha eleisaun parpamentár ne’e.
Ho asina nota entendimentu ida-ne’e, Sekretáriu Jerál Partidu ASDT ne’e apela ba estrutura tomak ASDT nian hosi nasionál, munisípiu, postu no suku ho aldeia iha territóriu nasionál katak dalan ne’ebé di’ak mak hamutuk fó apoiu tomak no vota ba partidu FRETILIN ho númeru sorteiu 11 iha eleisaun parlamentár ne’ebé sei akontese iha 21 maiu tinan ne’e.
“Hahú ohin ba oin, ami sei konvida estrutura nasionál, munisípiu, postu no suku ho aldeia sei konsentra iha sede, ofisialmente halo deklarasaun ba nota entendimentu ne’ebé ohin asina hodi hotu-hotu fila ba kontinua halo serbisu,” nia hateten.
Nia hateten, daudaun ne’e ASDT rejista nia militante iha territóriu hamutuk rihun 10-resin.
Jornalista : Nelson de Sousa
Editór : Cancio Ximenes
