LIQUIÇA, 6 maiu 2023 (TATOLI)— Partidu Associação Popular Monarquia Timorense (APMT) ho númeru sorteiu 17 kompremete atu desenvolve indústria bebidas iha Suku Ulmera, Munisípiu Liquiça hare’e ba poténsia aifuan oin-oin iha suku refere.
Komprimisiu hirak ne’e hato’o husi Vise-Prezidente Partidu APMT, Matias Boromeu bainhira halo kampaña eleitoral ho tipu Mini Diálogu iha Aldeia Manemuno, Suku Ulmera, Liquiça, sabadu ne’e.
Vise-Prezidente Partidu APMT ne’e hateten Suku Ulmera iha potensia barak ba aifuan no kafe maibé to’o agora seidauk hetan atensaun husi governu.
“Ita hakarak tau industria bebidas iha ne’e, hadia sistema industria kafe, tenke tau iha ne’e para populasaun sira moris ho kafe sente duni moris ne’e no vale duni husi sira nia knua. Alende kafe bele desenvolve ai kameli, aiata, sabraka para oinsa bele kria industri bebidas iha fatin ida ne’e, tanba geografikamente rai Liquiça iha Bazartete bele halo ida ne’e,” Matias Boromeu dehan iha Ulmera.
Matias Boromeu hatete, bainhira APMT hetan asentu iha Parlamentu Nasionál sei halo proposta atu bele desenvolve setór hortikultura iha Ulmera inklui hari’i koperativa atu grupu sira bele produz aifuan oin-oin no bele apoiu ba indústria bebidas.
APMT hakarak desenvolve Timor-Leste liu huai knua sira tanba fatin ne’e mak iha lisan ne’ebé kesi nanis ona ho nia povu, tanba, iha katuas lia nain, ferik sira no joven sira ne’ebé kesi aan metin ona ho tradisaun no kultura.
“Bainhira APMT hetan fiar, ita sei deskute makaas defende uma lisan iha uma fukun PN. Ita hakarak tau fundu apoiu kultura no uma lisan hodi fo subsidiu uma lisan iha Timor laran tomak,” nia afirma.
Iha fatin hanesan Prezidente APMT Liquiça, Agostinho de Fátima Brito Gomes kompremte APMT hakarak desenvolve setór tolu importante iha Liquiça hanesan peska, estrada no agrikultura.
“Prioridade estrada, tanba maske estrada nasional ne’e los ona maibe ligasaun postu to’o aldeia ne’e dalan ne’ebe perigozu tebes iha area postu no laiha ema ida mak tau prioridade,” nia deklara.
Suku Ulmera lokaliza iha Postu Bazartete-Municipiu Liquiça no kompostu hosi Aldeia hamutuk sia hanesan Ermeta, Esirat, Fatubesi-lolo, Manemuno, Manemori, Neran, Nauner, Terlau no Titisari
Kampaña Eleitoral husi partidu APMT ne’e rasik hahu iha tuku 03:00 lorokraik, hetan supervisaun husi CNE (Komisaun Nasionál ba Eleisaun).
Tuir orariu husi CNE, partidu APMT sei kontinua nia kampaña eleitoral iha Postu Administrativu Maubara, Munisípiu Liquiça iha loron 07 maiu 2023.
Jornalista : Cidalia Fátima
Editora : Armandina Moniz
