OÉ-CUSSE, 26 juñu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, konstrusaun estrada nasionál hosi sub-rejiaun Pante Makasar liga ba sub-rejiaun Oésilo seidauk bele hahú tanba kompañia sei halo hela mobilizasaun ba materiál sira hosi nasaun Repúblika Indonézia mai Oé-Cusse.
Notísia relevante: PM Taur felisita Autoridade RAEOA hatuur fatuk dahuluk ba estrada nasionál Oésilo
“Estrada nasionál Tono ba Oésilo, seidauk bele hahú tanba hosi kompañia sira halo hela preparativu ba mobilizasaun materiál,” Arsénio Paixão Bano, relata ba jornalista sira iha Oé-Cusse, segunda ne’e.
Ezekutivu ne’e afirma, parte tékniku sira diskute hela, tanba iha kontratu ne’e RAEOA tenke halo pagamentu advance paimant para kompañia bele hahú ona mobilizasaun.
“Ida-ne’e mak ita halo ona koordenasaun, bainhira hahú ona karik téknika no fiskalizadór tenke preparadu, kuandu hahú ne’e dala ida de’it,” nia afirma.
Entretantu, kompañia internasionál PT Waskita Karya, ezekuta projetu estrada nasionál ne’e sei hahú hosi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 18.
Valór kontratua projetu ne’e hamutuk $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun serbisu durante tinan rua.
Notísia relevante: Komunidade promete fó kontribuisaun ba projetu estrada Oésilo
Jornalista : Abílio Elo Nini
Editór : Evaristo Soares Martins
