DILI, 26 juñu 2023 (TATOLI)—Prezidente Konsellu Rede Feto Timor-Leste (RFTL), Zelia Fernandes, hateten Rede Feto Timor-Leste halo avaliasaun iha munisípiu Ermera no Bobonaro ne’e, iha rezulatdu hatudu iha Ermera no Bobonaro ne’e família trasik la apoia feto sira sai líder hodi asume pozisaun xave sira.
Notísia Relevante: Maria Fernanda Lay sai feto inspiradora ba feto Timor-Leste
“Bazeia ba programa no peskiza avaliasaun ne’ebé mak ami halo iha munisípiu Ermera no Maliana, ita haree katak feto sira bainhira prontu atu kompete iha eleisaun ida, fila-fali família mak ladun apoia. Entaun, ne’e hatudu katak loloos ne’e família mak apoia uluk feto maluk sira, atu nune’e sira bele espresa ka hatudu sira-nia abilidade no kapasidade hodi bele ba tuur iha pozisaun xave sira,” Zelia Fernandes, hateten ba Agência Tatoli, iha nia kna’ar fatin Obrigado Barack, Matadouro, segunda ne’e.
Tanba ne’e, nia hateten, Rede Feto Timor-Leste husu ba famílai sira atu apoia maluk feto sira hodi bele hatudu sira-nia matenek no abilidade ne’ebé mak iha liu hosi kaer ukun, se la apoia feto sira mak feto sira sei labele ba oin.
“Realidade ne’ebé hatudu mak ita-nia feto maluk Maria Fernanda Lay, feto potensiál, feto ne’ebé iha kualifikada tebes. Tanba, bainhira ita ko’alia kona-ba finansa, nia iha esperiénsia boot ba finansa públika nian. Nune’e, ba ha’u, nia hanesan ema-ne’ebé matenek no bele lidera segundu órgaun soberania ida-ne’e ba futuru ne’ebé mak di’ak no kualidade ho figura lideransa nian iha nasaun doben Timor-Leste,” nia dehan.
Maibé, nia hateten, hosi pozisaun ne’e Rede Feto Timor-Leste presiza haforsa no kaer liman hamutuk hodi kontinua halo advókasia ba feto atu bele iha korajen no iha vontade hodi labele tauk hamriik iha oin.
“Maibé, importante família mak apoia uluk no enkoraja atu sira bele fiar-aan hodi kompete,” nia dehan.
Jornalista : Osória Marques
Editór : Cancio Ximenes
