DILI, 07 jullu 2023 (TATOLI)—Udan-boot no inundasaun halo mota sa’e iha munisípiu Lautém, segunda (03/07), rezulta mota lori estudante na’in-tolu, ne’ebé na’in- rua konsege salva-an, enkuantu ida seidauk hetan to’o agora, nune’e família nafatin buka tuir.
Estudante ne’ebé seidauk hetan ho naran Joanico da Costa, idade 17 no eskola iha Ensinu Báziku Sentrál Odoforu, postu administrativu Luro, munisípiu Lautém, klase 8.
“Ami família to’o agora sei buka tuir alin nia isin, atu mate ka moris ami hakarak buka tenke hetan,” Reprezentante família, Janjeng Eduardo da Costa, informa ba Agência Tatoli, via telefónika, sesta ne’e.
Notísia relevante : Mota lori estudante tolu iha Lautém, ida to’o agora seidauk hetan
Nia dehan, família daudaun ne’e hetan apoiu hodi Bombeiru, Polísia inklui komunidade lokál hodi nafatin buka tuir Joanico da Costa.
“Ami agradese tanba buka mate-isin ami la mesak, daudaun ne’e ami família hamutuk ho parte relevante sira ne’ebé seidauk iha desizaun hosi família atu para. Ami sei buka alin nia isin, atu mate ka moris ami esforsu buka hetan,” nia akresenta
Jornalista : Arminda Fonseca
Editora : Julia Chatarina
